UNICEF distribúe subministracións de emerxencia aos nenos e familias afectadas polas inundacións en Paquistán

A organización reparte a diario 200.000 litros de auga entre os afectados, e enviou medicinas para máis de 500.000 persoas

UNICEF está a distribuír subministracións de emerxencia vitais, incluíndo centos de miles de litros diarios de auga potable, entre os nenos e as súas familias en situación vulnerable debido ás inundacións no sur de Paquistán.  

As novas e abundantes chuvias así como as persistentes inundacións están a contribuír a empeorar o desastre, con 5.400.000 persoas afectadas, incluíndo case 2.700.000 nenos. En Sindh, máis de 300.000 persoas abandonaron as súas casas inundadas en busca dun terreo máis alto. Moitos encóntranse agora diseminados en campamentos improvisados ao longo das estradas, colexios, ou edificios públicos próximos ás súas casas. Entre as necesidades máis inmediatas encóntrase o acceso a auga potable, saneamento, saúde e nutrición. Os nenos que están en situación de vulnerabilidade debido aos desprazamentos teñen un maior risco de contraer enfermidades como a diarrea e o sarampelo, e moitos destes nenos víronse afectados polas inundacións por segunda vez. "UNICEF xa está a chegar aos nenos con auga potable e vacinas, pero necesitamos aumentar as axudas e facer máis - e facelo rápido- por todos os medios posibles, " asegurou o Representante de UNICEF en Paquistán,Dan Rohrmann, que visitou onte o distrito de Badin para presenciar o desastre de primeira man.

UNICEF está a repartir ao redor de 200.000 litros de auga diarios a unhas 40.000 persoas. Ademais, 40 camións cisterna serán distribuídos adicionalmente nos próximos días, aumentando así a provisión de auga potable para as familias dispersadas, axudando así a evitar que se expandan as enfermidades que se transmiten pola auga, como a diarrea, que sitúa os nenos nunha situación de risco. UNICEF tamén subministrou de forma inicial 50.000 sobres potabilizadores de auga.UNICEF apoiou a distribución de case 60.000 mosquiteiras tratadas con insecticida ás familias gravemente afectadas e os seus aliados subministrarán esta semana outras 80.000 para proporcionar maior protección aos nenos. Equipos ambulantes vacinaron 100.000 nenos contra o sarampelo e a polio, mentres que UNICEF realizou un envío hoxe de medicinas básicas para máis de 500.000 persoas xunto con 977 kits para os recén nacidos. "Traballando sobre os postos de subministracións de emerxencia,UNICEF está a aumentar a súa resposta de emerxencia e traballará de forma conxunta co goberno e os seus aliados para asegurar unha asistencia urxente e coordinada que chegue aos nenos máis vulnerables e desfavorecidos con todos os seus esforzos, " dixo o Sr. Rohrmann.

"Os nenos que pertencen a familias pobres e vulnerables están entre os máis afectados polas fortes inundacións e necesitan axuda inmediata. Centos de miles de persoas víronse desprazadas dos seus fogares, con poucas posibilidades de volver nun curto período. O acceso a servizos esenciais é baixo, pero as subministracións de emerxencia están a chegar e fun testemuña dunha incrible capacidade de recuperación, " concluíu o Sr. Rohrmann.