UNICEF condena os ataques a profesores en Kaga-Bandoro
Tres profesores en formación, o director do Centro Rexional de Pedagoxía e o vicepresidente da Asociación de Pais foron brutalmente asasinados en Kaga-Bandoro, este mércores, segundo o Ministerio de Educación.
Segundo testemuñas que informaron
a UNICEF, homes armados atacaron a escola secundaria durante unha
sesión de formación. A capacitación era parte dun programa de
UNICEF financiado pola Unión Europea, en alianza coa organización
InterSOS, para reforzar o sistema educativo en República
Centroafricana
"Estes homes cometeron un acto
inaceptable de violencia contra civís, atacando tamén a persoas
desprazadas", explicou Mohamed Malick Fall, representante de UNICEF
en República Centroafricana. "Estamos totalmente consternados polos
feitos e moi tristes de ver que os profesores foron o branco destes
ataques, persoas que traballaban incansablemente pola educación dos
nenos en República Centroafricana".
A cidade de Kaga-Bandoro sufriu,
desde hai un mes, unha serie de incidentes violentos, ataques e
crimes en contra de organizacións humanitarias que xa reduciran os
seus persoais e actividades na rexión. O comezo do ano
escolar, que estaba previsto para o 19 de setembro, pospúxose en
Kaga-Bandoro debido á situación de inseguridade.
En todo o país, miles de nenos
non teñen acceso a educación porque as súas escolas foron saqueadas
ou están ocupadas e controladas por grupos armados.
"As instalacións educativas e as
escolas nunca deberían ser o branco dos grupos armados", dixo
Mohamed Malick Fall."Todos os nenos teñen o dereito a aprender na
contorna segura das súas escolas e tamén os profesores necesitan
esa mesma seguridade para poder facer o seu traballo de maneira
eficiente como educadores e mentores".
UNICEF destacou que os ataques
contra escolas son unha seria violación do dereito internacional e
fixo un chamamento ás partes para que cumpran coas súas obrigacións
e cesen os ataques contra institucións educativas.