UNICEF apoia os nenos que chegan a Europa fuxindo da violencia
UNICEF estableceu un espazo amigo da infancia cun equipo móbil preto da cidade de Geveglija, na fronteira con Grecia, para proporcionar o apoio que tanto necesitan as mulleres e nenos en tránsito na antiga República Iugoslava de Macedonia.
O espazo amigo da infancia instalouse dentro dos recintos da área
de descanso para os emigrantes establecido por ACNUR.
Un equipo móbil da ONG local LaStrada está a axudar a reunir os
nenos coas súas familias e a proporcionar apoio psicolóxico e
servizos para os nenos máis pequenos.
Este espazo está a proporcionar un lugar seguro aos nenos para que
descansen e xoguen mentres as súas familias completan os
procedementos de rexistro. Ademais, o equipo móbil está a examinar,
identifica e deriva os servizos de protección especializados a
aqueles nenos que o necesitan.
Este espazo, que pode dar apoio a uns 50 nenos á vez, está dotado
de materiais de arte, xogo e educacionais.
Durante o último mes o número de emigrantes que transitan polo país
incrementouse de 1.500 a 2.000 ao día. Aproximadamente o 30 por
cento son nenos e mulleres. Moitos están a fuxir do conflito nos
seus países de orixe como Sirya, Iraq e Afganistán. O maior risco
córreno os nenos emigrantes que viaxan sós, sen os seus pais ou
familiares adultos.
Os nenos desprazados están a ser trasladados dunha autoridade a
outra, forzados e en risco de caer en baleiros legais, políticas e
prácticas de tránsito nos países de acollida. Enfróntanse a un
futuro sen educación e con acceso limitado á xustiza e á sanidade.
Nalgunhas ocasións foron sometidos a detencións e prácticas de
controis fronteirizos que poñen as súas vidas en
perigo.
UNICEF urxe
ás autoridades a que recoñezan e traten a todos os nenos
emigrantes, independentemente do seu status
social, relixión ou afiliación, en primeiro lugar e ante todo como
nenos con dereitos, como establece a Convención das Nacións Unidas
sobre os Dereitos do Neno. Deben recibir coidado e atención
especial, así como protección non discriminatoria e
consistente. UNICEF continúa
dando seguimento á situación sobre o terreo, e traballando coas
autoridades locais para asegurar a protección dos nenos.
Nota para xornalistas:
A principios do presente ano, UNICEF presentou un plan de 10 puntos para guiar á Unión Europea acerca do interese superior dos nenos emigrantes ou refuxiados.