O FC Barcelona e UNICEF celebran o décimo aniversario da súa alianza polos nenos coa renovación por catro anos máis
O FC Barcelona e UNICEF renovaron hoxe o seu compromiso cos nenos máis vulnerables, mediante a firma dun novo acordo por catro anos máis. A renovación coincide co décimo aniversario da alianza entre as dúas organizacións, que xa conseguiu axudar a mellorar as vidas de máis de 1 millón de nenos en sete países.
Segundo as condicións do novo
acordo, o club de fútbol incrementará a súa contribución anual a
UNICEF de 1,5 a 2 millóns de euros. Os fondos apoiarán programas
para que nenos vulnerables de Brasil, China, Ghana e Sudáfrica
poidan acceder á educación física, ao deporte e ao xogo.
"Con este novo acordo o FC
Barcelona busca dar un paso máis nesta alianza. Os lazos entre
UNICEF e o Barça son agora máis fortes que nunca. Estamos unidos na
loita polos dereitos dos nenos e a promoción da educación a través
do deporte. O Barça é o club dos nenos do mundo e UNICEF é o mellor
aliado nesta viaxe", dixo Josep Maria Bartomeu, presidente do FC
Barcelona.
Nos últimos 10 anos a alianza
entre UNICEF e o FC Barcelona axudou a ampliar o acceso á
educación, ao deporte e ao xogo de moitos nenos que doutra forma
poderían quedar excluídos. A alianza tamén apoiou programas para
aumentar a concienciación sobre o VIH/SIDA nas comunidades máis
vulnerables de Angola, Malawi e Suazilandia.
"A alianza do FC Barcelona con
UNICEF xa axudou a máis de 1 millón de nenos en todo o mundo e o
noso novo acordo dará a mesmo máis nenos a oportunidade de aprender
e crecer a través do deporte e o xogo", dixo o director executivo
de UNICEF, Anthony Lake. "Todos en UNICEF estamos agradecidos polo
compromiso do FC Barcelona coa causa dos nenos, e eu persoalmente
estou encantado de que o noso querido Barça continúe sendo un
defensor desta causa".
Hai estudos que demostran que o
deporte e o xogo poden favorecer o san desenvolvemento físico e
cognitivo dos nenos e que son ferramentas importantes para promover
comportamentos e valores positivos.