O Embaixador de Boa Vontade Novak Djokovic visita en Serbia a nenos migrantes e refuxiados
O Embaixador de Boa Vontade de UNICEF Novak Djokovic visitou un espazo amigo da infancia de UNICEF en Belgrado, onde coñeceu a algúns dos nenos migrantes e refuxiados que chegaron á República de Serbia na súa viaxe até Europa occidental.
O xogador quedou profundamente
conmovido pola situación dos nenos, que constitúen case a terceira
parte da poboación refuxiada e migrante. A maioría foxe da
violencia en Siria, Afganistán e Iraq.
"Estes nenos estiveron viaxando
coas súas familias durante días, soportando unha calor abrasador e
noites frías e chuviosas. Están fisicamente exhaustos e
traumatizados psicoloxicamente", dixo Djokovic. "Os espazos amigos
da infancia de UNICEF proporciónanlles un lugar seguro onde
descansar, xogar e recibir atención psicosocial por parte de
profesionais".
Dende principios de ano, 129.947
persoas rexistráronse en Serbia como solicitantes de asilo. A
Axencia de Nacións Unidas para os Refuxiados, ACNUR, estima que
polo menos o mesmo número de persoas pasou por Serbia sen
rexistrarse.
UNICEF estableceu dous espazos
amigos da infancia, equipados con materiais educativos e xoguetes:
un no pobo de Presevo, preto da fronteira coa antiga República
Iugoslava de Macedonia, e o segundo na capital, Belgrado. Cada un
dos centros ten capacidade para que 50 nenos á vez poidan xogar e
recibir apoio psicosocial.
Case 1.100 nenos, a maioría de
entre 6 e 10 anos, descansaron e xogaron nestes espazos até agora.
Benefician aos nenos e tamén axudan aos seus pais, que percorreron
con eles longas distancia e agradecen o coidado que reciben.
Para responder á actual crise,
UNICEF Serbia contratou a máis traballadores sociais en Presevo e
Belgrado, que están a axudar a identificar ás familias e nenos máis
vulnerables e proporciónanlles a axuda adecuada. Tamén están a
axudar a desenvolver procedementos estándares sobre que facer cando
se identifican menores non acompañados.
Habilitáronse dúas salas de
lactación en Presevo e Belgrado onde as nais poden alimentar aos
seus bebés e recibir información sobre lactación materna. Uns 200
bebés e nenos pequenos tamén recibirán alimentos diariamente nestes
centros, e revisarase o seu estado nutricional.
Para contribuír á protección
física dos migrantes e refuxiados, UNICEF e os seus aliados están a
proporcionar información sobre minas terrestres, xa que moitas
familias están a viaxar a través de Croacia, onde quedan minas
terrestres e artefactos explosivos sen detonar debido aos conflitos
recentes.
"Os nenos migrantes e refuxiados
deben ser protexidos de maneira adecuada en liña coa Convención
sobre os Dereitos do Neno," dixo Djokovic. "Estes e moitos outros
nenos refuxiados e migrantes en Europa están a vivir en malas
condicións. Moitos están a durmir ao aire libre. E coa chegada do
inverno está en risco a saúde dos nenos pequenos".
E engadiu: "Está claro que a
mellor maneira de axudar a estes nenos en situación desesperada é a
través dunha acción coordinada para atallar as causas deste enorme
movemento - a través duns esforzos diplomáticos máis enérxicos para
acabar cos conflitos, e proporcionando aos países de orixe apoio
humanitario e para o seu desenvolvemento".