Nordés de Nixeria: alarmante aumento de ataques suicidas que involucran mulleres e nenas

Segundo informes recompilados por UNICEF, no nordés de Nixeria aumentou o número de mulleres e nenos utilizados como atacantes suicidas nos primeiros cinco meses deste ano, en comparación co ano pasado.

En 2014 rexistráronse 26 ataques suicidas en comparación cos 27 ataques de xaneiro a maio de 2015. En polo menos tres cuartas partes destes incidentes, as mulleres e os nenos foron utilizados, segundo os informes, para levar a cabo os ataques.

"Os nenos non están a instigar os ataques suicidas; son utilizados intencionalmente polos adultos do xeito máis horrible", dixo Jean Gough, representante de UNICEF en Nixeria. "Eles son ante todo vítimas, non perpetradores".

A frecuencia e a intensidade dos ataques suicidas que involucran mulleres e nenas aumentaron considerablemente este ano. As nenas e mulleres foron utilizadas para detonar bombas ou cintos con explosivos en lugares concorridos como mercados e estacións de autobuses.

Dende xullo de 2014, producíronse nove incidentes de suicidio que involucran nenos de entre 7 e 17 anos aproximadamente, todas elas nenas, segundo os informes. A súa identidade e idades exactas non foron verificadas xa que as estimacións se basean principalmente en relatos de testemuñas.

Estímase que uns 743.000 nenos foron desprazados polo conflito nos tres estados máis afectados do país; o número de nenos non acompañados e separados podería ascender 10.000, segundo estimacións de UNICEF.

"Moitos nenos foron separados das súas familias cando fuxiron da violencia, sen ninguén que coide deles", dixo Gough. "Sen a protección das súas familias, estes nenos teñen maior risco de explotación por parte dos adultos, e isto pode dar lugar á súa participación en actividades delituosas ou con grupos armados. "

UNICEF teme que a crecente utilización de nenos como atacantes suicidas podería levar a que os nenos sexan percibidos como unha ameaza potencial, o que poñería a todos os nenos vinculados a grupos armados en risco de represalias e impediría a súa rehabilitación e reinserción na comunidade.

UNICEF e os seus aliados traballan coas autoridades nacionais para reducir a vulnerabilidade dos nenos, identificando os nenos que non teñen pais ou familiares, e dándolles a atención axeitada. Ademais, máis de 35.000 nenos recibiron apoio psicosocial para que poidan facer fronte ao sufrimento agudo que sofren como consecuencia do conflito.

Como se espera que o próximo presidente de Nixeria preste xuramento nesta semana, UNICEF fai un chamamento ás autoridades nixerianas para que poñan no centro da súa axenda política a seguridade e o benestar de todos os nenos, especialmente os afectados polo conflito no nordés.