Máis mulleres e nenos buscan seguridade en Europa
O 60% dos migrantes e refuxiados que cruzan a fronteira entre Grecia e a antiga República Iugoslava de Macedonia son mulleres e nenos
Por primeira vez desde o comezo da crise de refuxiados e migrantes en Europa hai máis mulleres e nenos en tránsito que homes adultos, segundo UNICEF.
Os nenos e as mulleres constitúen
case o 60% dos migrantes e refuxiados que cruzan a fronteira entre
Grecia e Gevgelija, na antiga República Iugoslava de Macedonia. Os
nenos supoñen o 36% de quen arrisca as súas vidas cruzando o
perigoso mar entre Grecia e Turquía. Esta cifra podería ser maior,
xa que moitos nenos non declaran a súa idade ata chegar ao seu
destino.
"As consecuencias deste aumento
na proporción de mulleres e nenos migrantes e refuxiados son
enormes: significa que son máis os que se poñen en risco no mar,
especialmente agora que é inverno, e os que necesitan protección en
terra", dixo Marie Pierre Poirier, coordinadora especial de UNICEF
para a crise de refuxiados e migrantes en Europa. "Os sistemas de
benestar, protección e saúde deben ser reforzados en cada paso do
camiño para que as mulleres e os nenos non sexan vítimas de
explotación ou de baleiros legais".
Desde xuño de 2015, cando os
homes constituían o 73% do fluxo de migrantes, houbo un repunte de
mulleres e nenos: nesa data unha de cada dez persoas refuxiadas ou
migrantes era un neno, mentres que agora supoñen máis dun terzo do
total.
Aínda que se descoñece o número
exacto de nenos migrantes e refuxiados non acompañados e separados
das súas familias, 35.400 solicitaron asilo en Suecia, na súa
maioría novas afgáns; en Alemaña hai máis de 60.000 adolescentes
non acompañados, principalmente de Siria, Afganistán e Iraq.
UNICEF subliñou que todos os nenos
deben ser a prioridade en cada paso do camiño ?deben ser plenamente
informados dos seus dereitos para reclamar asilo e á reunificación
familiar en Europa. O interese superior de cada neno non acompañado
debe ser examinado antes de tomar ningunha medida. UNICEF apoia o
dereito de todos os nenos á reunificación familiar, especialmente
porque os menores que viven ou viaxan sen apoio dos seus familiares
están en risco de sufrir abuso e explotación por parte de mafias e
traficantes.
Para acceder a fotos e vídeos:
ftp://video.unicef.es/crisis_mediterraneo/
Usuario: Refcom
Contrasinal: uce442087