Máis de 1 millón de nenos con necesidade de axuda urxente tras tres anos de conflito en República Centroafricana
Preto de tres anos despois do conflito que estalou en República Centroafricana, estímase que 1,2 millóns de nenos teñen necesidade de axuda humanitaria urxente.
Mentres o país prepárase para
recibir ao Papa Francisco o domingo, nunha visita de dous días co
obxectivo de promover a reconciliación, UNICEF fai un chamamento a
todas as partes no conflito para conceder acceso ilimitado ás
organizacións que axudan aos afectados pola crise.
"A violencia que arrasou a este
país tivo un impacto devastador na vida dos nenos", dixo Mohamed
Fall, Representante de UNICEF en República Centroafricana. "As
necesidades humanitarias son abafadoras, e para alcanzalas
necesitamos acceso e maior apoio internacional".
UNICEF estima que máis de dous
millóns de nenos están afectados pola violencia que estalou en
decembro de 2012 e que alcanzou niveis de crises en decembro de
2013, seguindo enfrontamentos que conduciron ao desprazamento de
centos de miles de persoas na capital Bangui.
Preto de 400.000 persoas
permanecen desprazadas no país, e os enfrontamentos de setembro
xeraron 39.000 desprazados internos máis en Bangui. Ademais
medio millón de persoas están a vivir como refuxiados en países
veciños.
A inseguridade e a falta de
fondos seguen poñendo en risco as actividades urxentes para salvar
vidas, mentres os ataques aos transportes humanitarios ameazan o
despregamento das subministracións ao interior do país.
Mesmo nas zonas non afectadas
polo conflito, as comunidades continúan necesitando axuda. Ao redor
dun terzo da poboación non ten acceso a auga potable e o 41% dos
nenos menores de cinco anos sofren desnutrición crónica.
A pesar do nivel da emerxencia,
UNICEF recibiu 37 millóns de dólares - un pouco máis do 50% - dos
70,9 millóns de dólares que se necesitan para realizar
intervencións urxentes para salvar as vidas dos máis vulnerables en
2015.
Unha canción para a paz, composta
e cantada por nenos, está a escoitarse nas radios antes da visita
do Papa. A letra da canción, que fai un chamamento á unidade
nacional e a finalizar o conflito, foi presentada por tres nenos
como resposta a unha competición organizada por UNICEF coa
principal radio do país, Radio Ndeke Luka. Outros tres nenos foron
seleccionados para representar a canción.
"Temos esperanza de que as voces
destes nenos sexan ouvidas, e que a visita do Papa a República
Centroafricana promova a reconciliación, nun país que ten
necesidade urxente de paz", dixo Mohamed Fall.