Declaración sobre a situación dos nenos refuxiados e migrantes en Hungría
UNICEF está en contacto co Representante Permanente de Hungría ante a ONU en Nova York, para analizar como se debe protexer de maneira adecuada aos nenos refuxiados e migrantes, en liña cos compromisos do país coa Convención sobre os Dereitos do Neno.
A Convención esixe que os
gobernos tomen as medidas necesarias para protexer a todos os nenos
e que proporcionen un apoio especial aos nenos que están refuxiados
ou pedindo asilo.
UNICEF tamén ofreceu ao goberno
de Hungría apoio para fortalecer a protección dos nenos refuxiados
e migrantes, tras os violentos enfrontamentos do mércores na
fronteira entre Hungría e Serbia, e ante os informes de que a nova
lei introducida por Hungría podería levar a detención, persecución
e separación dos seus pais dos nenos que cheguen ao país.
Este apoio por parte de UNICEF
incluiría:
- Axudar co apoio psicolóxico aos nenos a través de equipos móbiles e espazos amigos da infancia nos centros de recepción e noutras zonas onde se agrupan as familias.
- Apoio na identificación de nenos separados e non acompañados, e na reunificación de familias.
- Apoio técnico e orientación para fortalecer os sistemas que poidan determinar o interese superior dos nenos que se están movendo polo país.
UNICEF urxe ao goberno de Hungría
a pór sempre en primeiro lugar o interese superior dos nenos
refuxiados e migrantes en todas as decisións que lles afecten. Os
nenos non deberían ser criminalizados por ser refuxiados ou
migrantes, nin ser separados das súas familias. Estes nenos xa
experimentaron un enorme sufrimento nas súas viaxes, e agora deben
ser tratados con dignidade e recibir toda a atención, protección e
comprensión que necesitan.
Ninguén debería pór aos nenos en
risco de sufrir ningún dano. As escenas que vimos o mércores, con
nenos atrapados no medio da violencia e os disturbios, non deberían
repetirse nunca.
UNICEF tamén insta a todos os
estados membros da UE a moverse rápido e proporcionar aos nenos
refuxiados e migrantes a protección e asistencia á que teñen
dereito. Ningún país pode cargar con esta responsabilidade el
só.