Declaración de Anthony Lake, director executivo de UNICEF, sobre o ataque a unha sala de profesores en Iemen
A pasada noite trece educadores e catro dos seus alumnos pagaron o peor prezo do continuo conflito en Iemen: foron asasinados nun ataque aéreo a unha sala de profesores en Amran, ao norte de Saná.
Os profesores estaban reunidos preparando os exames de miles de
nenos que perderon o final do seu ano escolar debido ao brutal
conflito. Como ían traballar durante horas levaran con eles os seus
nenos, algúns dos cales estaban a xogar fóra cando a bomba
explotou. Unha acción altruísta converteuse nun momento nun masacre
sen sentido.
Este horrible ataque tivo lugar en vésperas do Día Mundial da
Asistencia Humanitaria, unha data para apoiar a contribución dos
traballadores humanitarios e a inviolabilidade dos lugares onde
traballan. O ataque de onte á noite en Amran viola
os valores que deberiamos estar a celebrar hoxe.
Dende que a violencia se agravou en Iemen en marzo, unha media de
oito nenos son asasinados ou mutilados cada día. O impacto
inmediato nos nenos é atroz, pero as consecuencias a longo prazo
para o futuro de Iemen son terribles: UNICEF estima
que 1,8 millóns de nenos poderían sufrir desnutrición a finais de
ano, máis de 15 millóns de persoas carecen de acceso a
atención
sanitaria básica, o peche de escolas interrompeu a educación de
máis de 1,8 millóns de nenos, e máis de 20 millóns de persoas están
a loitar para conseguir o acceso a auga potable e saneamento que
necesitan.
Ningunha nación, ningunha sociedade, pode permitirse perder os seus
nenos debido a un conflito- xa sexa debido a ataques directos, á
desnutrición, a enfermidades, á falta de educación ou debido ao
trauma polos horrores dos que son testemuñas. En Iemen ou en
Nixeria... en Sirya, Sudán ou Sudán do Sur... en Iraq, Ucraína,
Somalia, República Centroafricana, ou noutros países afectados pola
guerra, xeracións enteiras de nenos estanse a
perder.
Sen dúbida, este Día Mundial da Asistencia Humanitaria debería ser
o último no que debamos lamentar a morte de tantos nenos e daqueles
que lles atenden, vidas perdidas en conflitos sanguentos dos que
non son responsables.