Debe parar o recrutamento e uso de nenos por parte dos exércitos e grupos armados

A Representante Especial da ONU para os nenos en conflitos armados e UNICEF lanzan a campaña 'Nenos, non soldados'

A Representante Especial do Secretario Xeral de Nacións Unidas para os nenos en conflitos armados, Leila Zerrougui, e o director executivo de UNICEF, Anthony Lake, lanzaron hoxe unha nova iniciativa para rematar antes do ano 2016 co recrutamento e uso de nenos por parte dos exércitos.

"Hai consenso entre os Estados sobre que ningún neno debería ser recrutado ou usado en conflitos por parte de grupos armados" dixo a Representante Especial durante o lanzamento da campaña 'Nenos, non soldados' en Nova York. "Chegou o momento de que o mundo se unha e pase páxina, dunha vez por todas, acerca do recrutamento e uso de nenos por parte de grupos armados en conflitos. " En todo o mundo, miles de nenos e nenas son recrutados por parte de exércitos ou grupos armados da oposición para servir como combatentes, cociñeiros, cargadores, mensaxeiros ou en calquera outra tarefa. As nenas, e ás veces os nenos, son tamén recrutados con fins sexuais. "Debe rematar o recrutamento e uso de nenos por parte dos exércitos" dixo o director executivo de UNICEF, Anthony Lake. "A campaña 'Nenos, non soldados' pretende centrarse neste asunto e darlle a atención que merece. Cando axudamos un neno que foi soldado a superar unha experiencia tan terrible e a prepararse para un novo futuro, facemos algo máis que reparar unha vida rota. Empezamos a pechar as feridas dunha nación esgazada polo conflito". As partes en conflito que utilizan nenos enuméranse nos anexos do informe anual do Secretario Xeral sobre os nenos en conflitos armados. Hai dez anos, o Consello de Seguridade pediu a todas estas partes que traballaran con Nacións Unidas e que preparasen plans de acción para poñer fin e previr o recrutamento e a utilización de nenos. Con este mecanismo, o Consello abriu a porta aos gobernos para afirmar o seu compromiso de que os nenos non deben estar nas súas forzas de seguridade e recibir a axuda necesaria para transformar este compromiso nunha realidade. Na actualidade, oito forzas de seguridade gobernamentais recrutan e usan nenos. Nos últimos tres anos, seis deses países asinaron os seus respectivos plans de acción coas Nacións Unidas: Afganistán e Chad en 2011, seguido por Sudán do Sur, Myanmar, Somalia e a República Democrática do Congo o ano seguinte. Tanto Iemen e Sudán expresaron o seu compromiso de liberar os nenos dos exércitos, así como continuar o diálogo coas Nacións Unidas.

Durante os próximos dous anos, a Oficina da Representante Especial, UNICEF, Nacións Unidas e as ONG asociadas redobrarán o seu apoio aos esforzos dos oito gobernos para asegurar que os nenos se reintegran na vida civil e que se poñen en marcha plans de acción para poñer fin e previr o recrutamento. Este apoio inclúe dar apoio técnico, identificar brechas e desafíos para a execución de plans de acción, e a mobilización de máis recursos para os programas de apoio no terreo. Aínda que a campaña se centra nos exércitos que figuran no informe do Secretario Xeral, Nacións Unidas seguirá traballando para facer fronte ás graves violacións cometidas polos grupos armados. Hoxe lánzase en Nacións Unidas a campaña 'Nenos, non soldados' durante un acto presentado por Jean Asselborn, Ministro de Asuntos Exteriores e Europeos de Luxemburgo. En xaneiro de 2013, Luxemburgo asumiu a presidencia do Grupo de Traballo do Consello de Seguridade sobre os nenos e os conflitos armados por un mandato de dous anos. "Os dereitos máis fundamentais dos nenos son violados cando se lles obriga a formar parte das hostilidades: o seu dereito á vida, á saúde, á educación, á protección contra a violencia física ou mental," dixo Jean Asselborn, Ministro de Asuntos Exteriores e Europeos de Luxemburgo. "O noso obxectivo común é asegurar que estes países culminen con éxito a tradución dos seus compromisos en accións concretas. Agora temos que impulsar o apoio da comunidade internacional, as organizacións rexionais e de todo o sistema das Nacións Unidas para asegurar que se dispoñan os recursos e coñecementos adecuados para chegar ao noso obxectivo '' ', dixo a Representante EspecialZerrougui.

####

Nota para a redacción

Un plan de acción é un compromiso asinado que permite ás Nacións Unidas apoiar as partes en conflito incluídas nos anexos do informe anual do Secretario Xeral sobre nenos e conflitos armados, no que se inclúen medidas concretas e prazos que deben tomar para poñer fin e previr o recrutamento e a utilización de nenos, así como outras violacións graves. As medidas solicitadas nos plans de acción polo xeral inclúen, pero non se limitan a, a emisión de ordes militares prohiben o recrutamento e utilización de nenos, a penalización do recrutamento e utilización de nenos, a liberación de todos os nenos que figuren nas filas das forzas de seguridade e a establecemento de programas de apoio á súa reinserción na vida civil, así como a inclusión de mecanismos de verificación de idade nos procedementos de contratación e o fortalecemento dos sistemas de rexistro de nacemento.