Chegan subministracións vitais de auga, saneamento e hixiene aos nenos afectados polo ciclón Pam
Unha semana despois de que o ciclón tropical Pam, de categoría 5, golpease as Illas do Pacífico, as necesidades máis inmediatas dos 60.000 nenos afectados son o acceso á auga, saneamento e hixiene. Segundo os informes iniciais o 60% da poboación de dúas das seis provincias de Vanuatu máis afectados, Shefa e Tafea, non ten acceso a auga potable. Actualmente estase a recoller e analiza información nas áreas afectadas.
UNICEF,
en estreita colaboración co goberno de Vanuatu e
os aliados no sector de Auga e Saneamento, estivo a traballar entre
os desafíos loxísticos, de comunicación e de subministración para
distribuír auga potable mediante a provisión de colectores de auga,
pastillas purificadoras e xabón ás comunidades e centros de
evacuación das provincias de Shefa e Tafea.
"Miles de familias afectadas non teñen acceso a auga debido á falta
de electricidade para que funcione a subministración de auga por
canalizacións, as augas subterráneas contaminadas e a destrución
das infraestruturas para recoller a auga de chuvia", dixo a
Representante de UNICEF Pacífico, Karen
Allen.
"Para nós é fundamental poder proporcionar auga potable aos nenos
vulnerables e as súas familias. A auga é un recurso vital para os
nenos neste momento difícil e estamos a facer todo o que podemos
para responder a esta necesidade urxente".
Segundo UNICEF,
xunto co alimento e o refuxio, a auga potable, o saneamento e a
hixiene son as prioridades máis importantes nas intervencións en
situacións de emerxencia. Se non se proporcionan rapidamente uns
servizos axeitados de auga e saneamento aos nenos e as súas
familias, a continuación chega a enfermidade e a morte. Se as
persoas afectadas non manteñen unha boa hixiene de xeito regular, o
risco de diarrea, cólera e outros brotes de enfermidades
continúa.
Como líder global do sector de auga e
saneamento, UNICEF está
a dar apoio ao Departamento de Xeoloxía, Minas e Recursos Hídricos
con avaliacións no terreo, priorización de necesidades
humanitarias, distribución de subministracións, reconexión de
servizos en centros de evacuación e comunidades, e a coordinación
total da resposta.
Como resposta inmediata, UNICEF entregou
subministracións de auga e saneamento para 2.000 familias ao
goberno provincial de Tanna.
Están a ser distribuídos para beneficiar a máis de 5.000 nenos. As
subministracións inclúen colectores de auga, pastillas
purificadoras e pastillas de xabón, que son produtos esenciais para
evitar o brote de enfermidades que se transmiten, a través da
auga.
Máis artigos de auga e saneamento están preparados para ser
enviados dende Fiyi.
Subministracións por valor de aproximadamente 700.000 dólares (uns
655.500 euros) para unhas 70.000 persoas están xa preparadas e
serán enviadas por avión dende o almacén de subministracións
de UNICEF en
Copenhaguen. UNICEF tamén
dará apoio aos aliados de auga e saneamento con xeradores, combustible e
transporte de auga.
A medio prazo, a reparación dos servizos de auga e saneamento nos
espazos de aprendizaxe temporais será unha prioridade, xa que
moitas escolas foron destruídas, incluíndo os servizos e os puntos
de acceso a auga.
Para descargar fotos e vídeos (por favor incluir crédito UNICEF):
Novas fotos:
Vídeos, incluíndo entrevistas con superviventes:
Canal de YouTube de UNICEF Pacífico: https://www.youtube.com/playlist?list=PLKIZuPp2cWuWygdPD48tu039JdFfjKCdJ
Para contribuir ao traballo de UNICEF nesta emerxencia:
https://www.unicef.es/cooperacion-internacional/donar-ong/hacer-donacion/fondo-de-emergencias
Por teléfono: 902 31 41 31 (luns a venres de 9 a 22 h, sábados de 11 a 17 h.)