Aumenta o número de mulleres e nenos que chegan á antiga República Iugoslava de Macedonia e a Serbia buscando refuxio en Europa
A cifra de mulleres e nenos que atravesan a antiga República Iugoslava de Macedonia e Serbia en busca de refuxio en Europa segue aumentando. Entre o 1 e o 6 de setembro preto de 10.000 persoas, das que aproximadamente o 40% son mulleres e nenos, rexistráronse tras cruzar á antiga República Iugoslava de Macedonia por Gevgelija procedentes de Grecia. No mesmo período tamén se rexistraron máis de 7.720 persoas que cruzaron a Serbia a través de Presevo.
É probable que o número de mulleres e nenos que chegaron aos
centros de recepción de ambos os dous países duplique as cifras
oficiais, xa que moitas familias seguen a súa viaxe sen rexistrarse
oficialmente.
Dende o mes de xuño, máis de 64.000 persoas rexistráronse no centro
de recepción de Gevgelija,
na antiga República Iugoslava de Macedonia, mentres que 89.161
persoas que expresaron a súa intención de solicitar asilo se
inscribiron en Serbia no
mesmo período.
Os refuxiados que entraron en Serbia e
rexistraron a súa petición de asilo teñen 72 horas para completar o
proceso. A maioría deles continúa a súa travesía en autobús cara ao
norte para chegar á capital, Belgrado, continuar ata Hungría e
finalmente chegar aos países do oeste ou norte de Europa. Moitos
están a fuxir da violencia en Sirya, Afganistán
e Iraq.
UNICEF e
os seus aliados seguen ampliando a súa resposta humanitaria nos
centros de recepción dos dous países. En Gevgelija, UNICEF abordou
rapidamente as necesidades inmediatas das mulleres e nenos,
proporcionándolles auga e alimentos axeitados a nenos de diferentes
idades, así como xoguetes. Tamén estableceu varios espazos amigos
da infancia, onde máis de 50 nenos á vez poden xogar e recibir
apoio psicosocial, e as mulleres poden descansar e coidar os seus
bebés. Estanse a instalar tres bidóns pregables con capacidade para
almacenar 10.000 litros de auga potable e para o
aseo.
No lado serbio da fronteira en Presevo, UNICEF puxo
en marcha un espazo amigo da infancia equipado con materiais
educativos e xoguetes. Tamén ofrece actividades recreativas e
educativas, que son boas para o benestar físico e emocional dos
nenos que chegaron a Serbia.
Os seus pais recibirán pronto asesoramento básico relacionado con
nutrición e saúde infantil, hixiene e temas de seguridade. Ademais
vanse abrir máis espazos amigos da infancia en Belgrado
e Kanjiza,
preto da fronteira con Hungría, para refuxiados e emigrantes que se
moven a través de Serbia.
UNICEF en Serbia estivo
a apoiar as autoridades sanitarias para definir unhas directrices
sobre alimentación para bebés e nenos e elaborar información para
nais lactantes. UNICEF podería
dar máis apoio sobre alimentación infantil, hixiene e saneamento,
se fose necesario.
Para acceder a vídeos e fotos:
ftp://video.unicef.es/crisis_mediterraneo
Usuario: Refcom
Contrasinal: uce442087
Para apoiar aos nenos sirios: www.unicef.es/siria