República Democrática do Congo: miles de nenos foxen da violencia

A recente violencia preto da localidade de Kamango no leste da República Democrática do Congo, obrigou máis de 66.000 congoleses, aproximadamente o 55 € dos cales son nenos, a buscar refuxio na veciña Uganda.

Moitos dos nenos refuxiados relataron escenas caóticas de ataques armados en medio da noite, provocando un pánico xeneralizado e que membros da mesma familia fuxisen en distintas direccións para evitar ser asasinado. Algúns nenos foron separados dos seus pais e irmáns en medio da confusión, facendo o seu propio camiño cara á fronteira con Uganda.
 

Nenos separados das súas familias

Polo menos 37.037 nenos refuxiados foron rexistrados pola Cruz Vermella de Uganda, dos cales 122 son menores de idade non acompañados que foron separados das súas familias como consecuencia da violencia. Ata agora, uns 63 menores de idade non acompañados reuníronse cun membro da súa familia.


A situación humanitaria que enfrontan moitos nenos no leste de República Democrática do Congo segue sendo moi grave. Ata xuño de 2013, estímase que 4.500 nenos permanecían nas filas das forzas e grupos armados, entre eles uns 2.000 na provincia de Kivu do Norte. Ningún dos responsables do recrutamento foi procesado ata agora. UNICEF tamén recibiu informes de nenos mortos ou feridos como consecuencia directa dos conflitos actuais.

 

Falta de acceso humanitario

Hoxe en día, o acceso humanitario vese gravemente obstaculizado no leste da República Democrática do Congo, o que fai difícil a UNICEF e os seus aliados dar asistencia aos que máis a necesitan. Dende 2011 documentáronse 376 casos de denegación de asistencia humanitaria e foron atacadas 113 escolas e instalacións médicas polas partes involucradas no conflito. A tendencia é á alza e UNICEF fai un chamamento a todas as partes para asegurar que os nenos estean protexidos contra toda forma de violencia, explotación e abuso.

o traballo de UNICEF

En Uganda, UNICEF está a responder ás necesidades inmediatas dos nenos refuxiados congoleses, distribuíndo kits de escolas nunha maleta e apoiando a reanudación das clases nas escolas, aloxando os refuxiados, creandoEspazos Amigos da Infancia, proporcionando subministracións de saúde, así como vacinas e subministracións que salvan vidas, auga, saneamento e hixiene.


Nos últimos dous anos e medio en República Democrática do Congo, UNICEF e os seus aliados axudaron a 10.152 nenos involucrados en forzas e grupos armados, con custodia temporal, reunificación familiar e reintegración socioeconómica. Máis de 16.000 nenos recibiron apoio psicosocial e tratamento médico.


UNICEF necesita preto de 7,5 millóns de dólares (uns 5.650.000 euros) para continuar brindando axuda humanitaria aos nenos refuxiados congoleses en Uganda ata final de ano, ademais son necesarios 78 millóns de dólares (uns 58.775.000 euros) para continuar as operacións humanitarias na propia República Democrática do Congo.