UNICEF únese ao chamamento urxente do PMA para retomar a axuda alimentaria a 1,7 millóns de refuxiados sirios
UNICEF únese ao chamamento de apoio urxente ao Programa Mundial de Alimentos (PMA) despois de que a axencia da ONU se vise forzada a suspender a axuda alimentaria para 1,7 millóns de sirios vulnerables na rexión.
As familias corren o risco de caer na miseria e moitos nenos
poderían verse obrigados a traballar para contribuír aos ingresos
familiares cos que adquirir alimentos básicos. Isto, á súa vez,
podería desembocar nun maior abandono escolar. E, ademais, a
suspensión da axuda alimentaria contribuirá á crecente sensación de
desespero, particularmente entre os nenos, as nais en período de
lactación, as persoas con minusvalidez e os
maiores.
"Os nenos sirios e as súas familias están a pagar un prezo moi alto
como resultado da actual crise", dixo Maria
Calivis,
directora rexional de UNICEF para
Oriente Medio e Norte de África. "Mentres se achega o inverno, a
falta de financiamento para alimentos terá un impacto desvastador
sobre eles".
Se chega financiamento, o PMA poderá
continuar a axuda para os nenos sirios a través dun sistema de
cupóns que permita ás familias comprar comida nos mercados
locais.
UNICEF fai
un chamamento urxente aos países doadores para cubrir as
necesidades críticas dos nenos sirios e as súas familias, así como
para evitar un desastre inminente.
Para máis información sobre as necesidades actuais e a resposta
rexional de UNICEF fronte
ao inverno dos nenos sirios: http://childrenofsyria.info/winter/
Acerca de UNICEF
UNICEF promove os dereitos e o benestar de todos os nenos e nenas en todo o que facemos. Xunto aos nosos aliados, traballamos en 190 países e territorios para transformar este compromiso en accións prácticas, centrando especialmente os nosos esforzos en chegar aos nenos máis vulnerables e excluídos para o beneficio de todos os nenos, en todas as partes.