UNICEF traballa xunto aos seus aliados para frear o brote de cólera na República Centroafricana
Polo menos 16 persoas morreron no primeiro brote de cólera que afecta á República Centroafricana desde o ano 2011. O brote foi declarado polas autoridades nacionais, o 10 de agosto. Rexistráronse 66 casos, polo menos sete deles en nenos, ao longo do río Oubangui.
"Os nenos pequenos, especialmente
os menores de cinco anos, son particularmente vulnerables a esta
enfermidade mortal", dixo Mohammed Malick Fall, representante de
UNICEF na República Centroafricana. "Temos que actuar con rapidez
para garantir que esta enfermidade, facilmente prevenible, non leve
por diante máis vidas".
O cólera é unha doenza diarreica
aguda causada pola inxestión de alimentos ou auga que foi
contaminada pola bacteria Vibrio cholerae, que se atopa na materia
fecal.
O brote comezou en Djoukou, no
distrito de Kemo, unha zona de difícil acceso situada a uns 100
quilómetros río arriba da capital, Bangui. As comunidades nesta
zona teñen pouco ou ningún acceso a auga potable e utilizan o río
Ubangui como a súa principal fonte deste elemento. O acceso por
estrada a algunhas destas zonas é moi difícil se non imposible. As
persoas afectadas que viaxan en embarcacións sobrecargadas
favoreceron a expansión da bacteria río abaixo.
En colaboración co Ministerio de
Saúde e os seus aliados, UNICEF está a proporcionar medicamentos,
auga potable, tabletas de purificación de auga e kits de hixiene ás
comunidades afectadas.
Ademais, voluntarios das
comunidades nas zonas afectadas están a formar aos seus concidadáns
para que coñezan e apliquen medidas de prevención como só beber
auga potable, lavarse as mans con xabón, comer os alimentos
cociñados e evitar a defecación ao aire libre. A mobilización
comunitaria é clave para previr a propagación da enfermidade xa que
a maioría dos pobos afectados non teñen acceso a electricidade ou
rede telefónica.
Acerca de UNICEF
UNICEF promove os dereitos e o benestar de todos os nenos e nenas en todo o que facemos. Xunto aos nosos aliados, traballamos en 190 países e territorios para transformar este compromiso en accións prácticas, centrando especialmente os nosos esforzos en chegar aos nenos máis vulnerables e excluídos para o beneficio de todos os nenos, en todas partes.