UNICEF subministra 300.000 artigos de hixiene, saneamento e auga para as vítimas das inundacións en Tailandia

A organización está a apoiar tamén a creación de Espazos Amigos da Infancia e distribuíndo Escolas nunha maleta a uns 1.000 colexios

UNICEF está a proporcionar máis de 300.000 artigos de hixiene, saneamento e auga, como pastillas de xabón, pingas de cloro para purificar a auga, xel para lavarse as mans e bolsas de lixo, ás familias afectadas polas inundacións, co fin de contribuír a previr a propagación de enfermidades transmisibles.
 

Os artigos, adquiridos no propio país, están a chegar ás familias afectadas a través do Ministerio de Saúde Pública. A este organismo entregáronselle onte preto de 27.000 botellas de cloro, que poden usarse para potabilizar 2.000 litros de auga cada unha, e hoxe mesmo 7.000 botellas de xabón líquido. A próxima semana proporcionaranse unhas 200.000 pastillas de xabón e outras 33.000 botellas de cloro.

UNICEF fixou en 1,2 millóns de dólares as necesidades orzamentarias para proporcionar axuda de emerxencia e asistencia aos nenos e familias afectadas polas inundacións nas áreas de saúde, protección infantil, subministración de auga e saneamento, promoción da hixiene e educación. A principios desta semana UNICEF fixo un chamamento directo aos seus doantes en Tailandia para que apoien economicamente as accións de resposta ás inundacións e as actividades de recuperación.

"A hixiene e o saneamento son sempre unha gran preocupación en calquera inundación", sinalou Tomoo Hozumi, Representante de UNICEF en Tailandia. "Aínda que non se notificaron brotes até o momento, as augas contaminadas das inundacións poden ocasionar enfermidades.  O risco destas enfermidades poden reducirse a través dun saneamento adecuado e a mellora nas prácticas de hixiene, como lavarse as mans frecuentemente".

 O número de nenos que morreu durante as inundacións tamén é motivo de preocupación, agregou Hozumi. Até a data, as inundacións cobráronse 533 vidas, incluíndo 77 nenos. A maioría das mortes de nenos, dos que o 70% eran menores de 17 anos, foron por ahogamiento.

"Os nenos que se atopan atrapados en casas  rodeadas pola auga non teñen espazo para xogar, polo que terminan xogando na auga. Debido a que moitos nenos tailandeses non saben nadar, isto entraña un gran risco".

UNICEF distribuíu folletos con información sobre accións prácticas e sinxelas que as familias deberían adoptar para protexer a saúde e o benestar xeral dos seus fillos durante as inundacións, incluíndo a prevención de ahogamientos e outras posibles lesións. Outros 300.000 exemplares destes folletos repartiranse entre as familias afectadas durante os próximos días a través da rede rural de voluntarios de saúde do Ministerio de Saúde Pública.

UNICEF apoiou a creación de Espazos Amigos da Infancia en 40 centros de evacuación, para proporcionar lugares seguros para actividades recreativas e de apoio psicosocial para os nenos, así como formación no rexistro de nenos e a prevención do abuso e a explotación infantil nos centros.

Mentres as augas están a retroceder nalgunhas provincias, UNICEF distribuirá Escolas nunha maleta a uns 1.000 colexios que resultaron seriamente danados polas inundacións. Cada Escola nunha maleta contén materiais básicos para a aprendizaxe e o ensino a un máximo de 80 alumnos, e emprégase  para que os nenos continúen aprendendo en espazos temporais mentres se reparan e reconstrúen as súas escolas.

"Lograr que os nenos regresen á escola e a unha rutina normal canto antes, axudará a acelerar a súa recuperación despois deste desastre. UNICEF quere facer todo o posible para que así sexa".