UNICEF: necesítase unha urxente acción conxunta para protexer os nenos refuxiados
Só unha acción decidida para aloxar e atender os nenos agora pode evitar máis mortes e sufrimento nos próximos mesesEuropa ten a oportunidade, antes de que se achegue o inverno, de protexer e atender ás decenas de miles de nenos que buscan refuxio, manifestou UNICEF hoxe.
Aproximadamente un cuarto dos que buscan refuxio en Europa este ano
son nenos. Máis de 106.000 nenos solicitaron asilo no primeiro
semestre de 2015, o que supón un 75 por cento máis respecto ao ano
pasado.
Moitos nenos e nenas refuxiados e emigrantes en Europa están a
vivir en condicións inadecuadas de amoreamento, onde están expostos
a riscos de violencia, explotación e abuso. Moitos están a durmir
ao aire libre. A medida que se achega o inverno, a saúde dos nenos
máis pequenos corre un maior risco coa ameaza de enfermidades como
a pneumonía. Só unha acción decidida para aloxar e atender os nenos
agora pode evitar máis mortes e sufrimento nos próximos
meses.
Co crecente número de nenos que viaxan en condicións perigosas a
Europa e dentro de Europa, é esencial unha acción decidida cunha
xusta distribución da responsabilidade en toda a Unión Europea.
Isto debe incluír a posta en marcha dunha serie de garantías
inmediatas para os nenos e as súas familias:
· Centros seguros de recepción para os nenos que chegan, con acceso
a servizos de saúde, apoio psicosocial, recreación e
educación.
· Máis prazas
de reasentamento en toda Europa e visados humanitarios para os
nenos e as súas familias. A tramitación dos casos de asilo debe
facerse a tempo, e centrarse sempre no interese superior do
neno.
· Un compromiso
máis forte de reasentar os refuxiados procedentes de países en
conflito para reducir a probabilidade de que os refuxiados recorran
a rutas inseguras e evitar o contrabando de
persoas.
· Intensificar as
operacións de busca e rescate en mar e terra.
· Acelerar os
programas de reunificación familiar para nenos separados e non
acompañados.
· Contar cun
número axeitado de especialistas en benestar infantil capacitados
para atender e orientar aos nenos e as familias.
Esta atención e custodia está recollida na Convención sobre os
Dereitos do Neno, que establece a protección de todos os nenos xa
sexa cando teñan que fuxir dos seus fogares, no mar, na terra, ou
nas beiras dos países de destino.
UNICEF urxe
á comunidade internacional a facer fronte ás causas fundamentais
deste enorme movemento de nenos desesperados a través de esforzos
diplomáticos máis enérxicos para poñer fin aos conflitos, e
proporcionar a axuda humanitaria e o desenvolvemento necesarios nos
países de orixe.
Para apoiar aos nenos sirios: www.unicef.es/siria