UNICEF e David Beckham presentan "7", un novo fondo para os nenos en perigo en todo o mundo

O ídolo mundial conmemora os seus 10 anos como Embaixador de Boa Vontade de UNICEF cunha nova campaña para poñer os nenos primeiro

David Beckham e UNICEF presentan hoxe unha iniciativa innovadora, 7: O Fondo David Beckham UNICEF, para protexer contra o perigo millóns de nenos en todo o mundo.

Cando se cumpren 10 anos dende que Beckham iniciou o seu labor como Embaixador de Boa Vontade de UNICEF, "7" é o compromiso persoal de David durante a próxima década para axudar aos nenos máis vulnerables do mundo. A través de "7", David vai usar a súa grande influencia en todo o mundo, así como as súas relacións, para recadar fondos vitais e animar os líderes mundiais a lograr un cambio positivo e duradeiro para os nenos.

Sobre o seu labor en UNICEF, David Beckham dixo: "Fun embaixador de boa vontade durante 10 anos e síntome moi honrado de formar parte do labor incrible que UNICEF realiza en favor dos nenos".

"Hoxe en día, a necesidade de axudar aos nenos nunca foi maior e dende que me retirei teño máis tempo e quero facer moito máis. Por iso estou a establecer este novo fondo con UNICEF. "7" representa o meu compromiso continuo de axudar aos nenos que máis o necesitan en todo o mundo. Estou a intensificar o meu apoio porque podo, porque quero e porque o resultado axudará a cambiar as vidas de millóns de nenos. Todo o que fixen, a miña carreira futbolística, a miña familia, levoume a este punto: é o momento de facer todo o que poida para axudar aos nenos en todos os cantos do mundo. Isto é algo" do que "quero que os meus propios fillos se sintan orgullosos".

"Nos próximos anos vou traballar con UNICEF para recadar millóns e falar en favor dos nenos de todo o mundo. Estou a planear numerosas iniciativas de recadación de fondos e tamén espero viaxar moito máis para reunirme cos nenos, o persoal de UNICEF e os líderes mundiais co fin de axudar a crear conciencia e aumentar o ritmo do cambio. Hai algúns plans moi emocionantes por diante e estou moi orgulloso de formar parte de todo isto".

O lanzamento de "7", chamado así en honor ao número da sorte deBeckham nas súas famosas camisetas de Inglaterra e o Manchester United FC, prodúcese despois dun dos anos máis desvastadores da historia para os nenos.

Máis de 15 millóns de nenos estiveron expostos á violencia extrema nos principais conflitos de 2014, mentres que millóns máis se viron afectados polos desastres naturais, e miles quedaron orfos e sen escolas como consecuencia da desvastadora epidemia do ébola. Máis alá das situacións de emerxencia, os nenos tamén correron outros graves riscos, xa que 168 millóns de nenos e nenas en todo o mundo son vítimas do traballo infantil e moitos outros da violencia sexual, a trata e a mutilación xenital feminina.

"7" ten como obxectivo aproveitar o potencial e a esperanza que suscita 2015, un ano en que os líderes internacionais acordarán novas metas globais que cambiarán as vidas dos nenos nos anos vindeiros. A través de "7", David Beckham recadará fondos vitais e promoverá o cambio para asegurar que UNICEF e os seus asociados poidan obter resultados para os nenos -xa sexa en educación, auga e saneamento, atención da saúde ou protección social- e chegar aos nenos que máis o necesitan.

UNICEF estableceu lugares clave en sete rexións do mundo cuxos programas necesitan con urxencia fondos para axudar a salvar e cambiar a vida dos nenos nos próximos tres anos. Algúns son programas en cidades e pobos, outros son programas a nivel nacional ao longo de todo un país e outros ao longo de toda unha rexión. Todos son lugares onde os nenos viven en perigo neste momento -a causa da violencia, o abuso ou a enfermidade- lugares onde, ata a data, a falta de financiamento significou que os nenos sigan sendo vulnerables.

Mediante o financiamento destes programas nos próximos tres anos, "7" podería axudar a UNICEF a:

• Proporcionar servizos de protección da infancia e apoio en materia de orientación aos nenos Del salvador, o país coa taxa de homicidios infantís máis alta do mundo.
• Proporcionar bombas de auga e capacitar ás comunidades sobre o seu mantemento en Burkina Faso, onde na actualidade 1 de cada 5 mortes infantís están causadas pola diarrea.
• Apoiar as nais que aleitan os seus fillos para que lles dean un mellor comezo de vida en Papúa Nova Guinea, onde a desnutrición infantil causou atraso no crecemento a case a metade de todos os nenos menores de cinco anos.

Hoxe, durante a presentación de "7", Beckham tamén pediu o público e as súas fans que se unan con el na adopción de medidas en favor dos nenos. Pediu ao público que, ao engadir o seu nome a esta campaña internacional, avale o seu chamado aos líderes mundiais para poñer os nenos primeiro e axudar a rematar coa violencia, as mortes previbles e a pobreza de todos os nenos mentres negocian un novo plan de traballo para o desenvolvemento mundial.

"David Beckham dedicou os seus 10 anos como Embaixador de Boa Vontade de UNICEF a falar en favor daqueles que máis o necesitan, os nenos e nenas máis vulnerables do mundo", dixo Pomba Escudeiro, do Equipo Mundial de Xestión de UNICEF.

David creou conciencia sobre os principais perigos que confrontan os nenos -incluíndo a desnutrición, o ébola e a sida- e viaxou conUNICEF a Serra Leoa, Sudáfrica, Thailandia e máis recentemente a Filipinas, onde axudou a recadar fondos vitais para os nenos afectados polo tifón Haiyan. A través de 7: O Fondo de David Beckham UNICEF, poderemos traballar xuntos para impulsar o cambio positivo en favor dos nenos".

Simon Fuller, socio comercial e amigo de Beckham dende hai moitos anos, engadiu: "David é un apaixonado do seu traballo con UNICEF e do benestar e a saúde dos nenos e nenas máis vulnerables do mundo. Ten unha conexión única cos nenos, é algo extraordinario do que fun testemuña durante moitos anos. Agora que David está a avanzar cara á etapa seguinte da súa vida profesional como empresario exitoso, quere centrarse aínda máis en marcar unha diferenza. Dende que se retirou do deporte profesional, ten máis tempo dispoñible para dedicalo ao seu traballo benéfico. Tómase moi en serio a idea de marcar unha diferenza e estou moi orgulloso de velo con tanta concentración e cunha intención positiva en favor dunha causa tan incriblemente valiosa".

En 2015, o mundo poñerase de acordo sobre unha serie de novos obxectivos mundiais que poderían cambiar as vidas dos nenos nos anos vindeiros. Únete a David Beckham e a UNICEF para pedir aos líderes mundiais que #putchildrenfirst (poñan os nenos primeiro). Xuntos, podemos axudar a rematar coa violencia, as mortes previbles e a pobreza para todos os nenos. Suma a túa voz agora en 7.org

#Beckham7

#putchildrenfirst

Para descargar fotos e vídeos: ftp://video.unicef.es/Beckham

Usuario: Refcom / Contrasinal: uce442087

Notas para a redacción:

Nos últimos 10 anos, David Beckham desempeñou un papel crucial no labor de UNICEF para salvar e mellorar as vidas dos nenos. Os puntos máis importantes inclúen:

• En 2005, David Beckham axudou a lanzar un chamamento e un conxunto de subministracións de emerxencia para os nenos afectados polo tsunami na división de subministracións de UNICEF en Copenhaguen.
• En 2008 David visitou Serra Leoa para presentar o informe de UNICEF Estado Mundial da Infancia e chamar a atención mundial sobre o problema dos nenos que morren antes de cumprir cinco anos.
• En 2009, David visitou Sudáfrica para observar o traballo de UNICEF cos nenos e as familias que viven con VIH e sida.
• En 2011, David contribuíu ao lanzamento do chamamento do Comité de UNICEF no Reino Unido para a crise alimentaria en África oriental.
• En 2012, David entregou ao primeiro ministro do Reino Unido, David Cameron, unha carta asinada por máis de 50 personalidades antes dun cumio mundial sobre a fame, contribuíndo a garantir o compromiso dos líderes mundiais para reducir a desnutrición infantil antes de 2016.
• David contribuíu en 2013 ao lanzamento do chamamento de UNICEF para o tifón Haiyan, que provocou o desprazamento de 1,7 millóns de nenos e a morte de moitos outros. David tamén viaxou a Filipinas para reunirse cos nenos e as familias afectadas polo tifón.
• En 2014, David gravou unha mensaxe de vídeo en apoio da loita de UNICEF para combater o ébola,que se emitiu en Serra Leoa, un dos países máis afectados, e chegou a máis de 2 millóns de persoas.

Acerca de UNICEF

UNICEF promove os dereitos e o benestar de todos os nenos e nenas en todo o que facemos. Xunto aos nosos aliados, traballamos en 190 países e territorios para transformar este compromiso en accións prácticas, centrando especialmente os nosos esforzos en chegar aos nenos máis vulnerables e excluídos para o beneficio de todos os nenos, en todas as partes.