UNICEF axuda a recuperar a vacinación contra o sarampelo nos países afectados polo ébola

Os casos de sarampelo aumentaron na rexión e os sistemas de saúde están desbordados poñendo miles de nenos en risco de sufrir enfermidades mortais

UNICEF está a axudar aos gobernos e as comunidades a volver poñer en marcha a vacinación contra o sarampelo despois dun aumento dos casos nos países afectados polo ébola, onde os sistemas de saúde están desbordados e decenas de miles de nenos permanecen expostos a diversas enfermidades mortais.

"O sarampelo é unha importante causa de mortalidade infantil que se pode deter doadamente cunha vacina segura e efectiva", dixo Manuel Fontaine, Director Rexional de UNICEF para África Occidental e Central. "Pero as taxas de inmunización reducíronse considerablemente, ameazando aínda máis as vidas dos nenos".

En Guinea, onde se declarou un brote de sarampelo a principios de 2014 -antes do ébola- o número de casos confirmados de sarampelo case cuadriplicouse, de 59 entre xaneiro e decembro de 2013 a 215 no mesmo período en 2014, segundo a OMS. En Serra Leoa, a cifra triplicouse de 13 a 39 no mesmo período.

En Liberia, onde non se rexistrara ningún caso de sarampelo en 2013, confirmáronse catro casos no condado de Lofa, unha das zonas máis afectadas polo ébola.

O aumento dos casos de sarampelo -unha enfermidade altamente contaxiosa- é motivo de especial preocupación, debido a que unha diminución das taxas de cobertura da inmunización deixou aos nenos vulnerables nunhas datas, entre decembro e marzo, na que o ritmo de transmisión do sarampelo é tradicionalmente elevado en África occidental.

Os sistemas de saúde están desbordados polos esforzos para encarar a crise do ébola, e a poboación está a evitar os centros de saúde por temor a contraer o virus. Como resultado, os primeiros datos mostran claramente que en 2014 as taxas de cobertura da vacina se reduciron considerablemente.

En Liberia, por exemplo, os datos do goberno mostran que a cobertura mensual de inmunización contra o sarampelo en comparación co obxectivo marcado, se reduciu dun 71% en maio de 2014 a un 55% en outubro, segundo as cifras, que figuran nos informes proporcionados só polo 50% dos centros de saúde.

Aínda que as campañas de vacinación que implican a concentración dun gran número de persoas están suspendidas, UNICEF e os seus aliados están a intensificar os labores de vacinación sistemática, coidadosamente supervisados, para reducir rapidamente o número de nenos que non están vacinados.

En Guinea, UNICEF brinda apoio ás actividades dirixidas a intensificar a vacinación sistemática, cuxa fase inicial, a finais de novembro e principios de decembro de 2014, abrangueu as comunidades que non rexistraran ningún caso de ébola durante 42 días.

En resposta aos casos de Liberia, UNICEF, o Ministerio de Saúde e outros asociados, entre eles a OMS, están a levar a cabo a intensificación periódica da inmunización sistemática para vacinar os nenos menores de 5 anos e proporcionarlles suplementos de vitamina A. Este labor xa finalizouse en oito condados, está en marcha noutros catro, e está programado para comezar nos tres restantes.

Mentres os vacinadores levan a cabo a tarefa de proporcionar vacinas que salvan vidas -e que en moitos casos se debían ter administrado hai tempo- tamén contribúen na loita contra o brote do ébola. De conformidade cos procedementos de control e prevención de infeccións e coas directrices da OMS en materia de inmunización no contexto dun brote de ébola, UNICEF está a proporcionar non só vacinas, senón tamén caixas de primeiros auxilios que inclúen luvas e termómetros infravermellos para vacinadores. Os vacinadores están a ser formados na prevención de infeccións e a aplicación de medidas de control, a supervisión durante as actividades de inmunización e sobre a forma de levar a cabo sesións de divulgación nas zonas onde non se rexistraron casos de ébola dende hai 42 días.

Romper o ciclo de transmisión do ébola e mellorar os servizos de saúde, incluíndo as vacinas, deben ir da man co obxectivo de derrotar ao virus e previr mortes infantís a grande escala.

UNICEF está a desempeñar un papel importante na resposta mediante a promoción de comportamentos que poidan axudar a deter a transmisión; a creación de centros de atención comunitaria, onde os pacientes poden recibir apoio das súas familias e comunidades e contan cun sistema de referencia para os casos complicados; e a distribución de subministracións esenciais. Tamén está a axudar a formar os traballadores de saúde comunitarios, ao tempo que ofrece apoio psicosocial aos nenos afectados polo ébola e garante o acceso aos sistemas de auga potable e de eliminación de residuos, que son esenciais para a prevención de novas infeccións.

"O mellor xeito en que podemos axudar os nenos é detendo o ébola, ao mesmo tempo que fortalecemos os sistemas de saúde", dixo Fontaine. "Necesitamos restaurar a fe no sistema de saúde e ofrecer ás comunidades oportunidades sistemáticas para que os seus fillos reciban as vacinas que necesitan para manterse saudables".

"Os vacinadores e outros traballadores da saúde que están na primeira liña necesitan sentirse protexidos para poder realizar intervencións que salven vidas no contexto do ébola", agregou Fontaine.

Acerca de UNICEF

UNICEF promove os dereitos e o benestar de todos os nenos e nenas en todo o que facemos. Xunto aos nosos aliados, traballamos en 190 países e territorios para transformar este compromiso en accións prácticas, centrando especialmente os nosos esforzos en chegar aos nenos máis vulnerables e excluídos para o beneficio de todos os nenos, en todas as partes.