República Centroafricana: nenos atacados brutalmente nun violento fin de semana
Un grupo de nenos foi atacado deliberadamente durante o último estalido de violencia en República Centroafricana, no que preto de corenta persoas morreron e máis dun centenar resultaron feridas. Os feitos producíronse o pasado sábado na capital do país, Bangui.
Os informes preliminares das
organizacións locais indican que tres nenos de 16 e 17 anos foron
asasinados brutalmente, un deles decapitado; polo menos outros dous
mozos e dúas nenas de entre 7 e 17 anos resultaron feridos por
disparos ou fragmentos de granada nun violento enfrontamento entre
grupos armados.
"Nada pode justificar o ataque
deliberado contra os nenos", dixo Manuel Fontaine, director
rexional de UNICEF para África Occidental e Central. "Estes atroces
crimes contra nenos e nenas que quedan atrapados entre faccións
enfrontadas deben parar, e quen os levan a cabo deben responder por
iso".
UNICEF insta a todas as partes no
conflito a respectar as súas obrigacións conforme ao dereito
Internacional, e a deter os ataques a civís e a infraestruturas
esenciais como escolas e instalacións sanitarias.
O conflito en República
Centroafricana esnaquizou comunidades de todo o país, deixando ao
seu paso destrución e provocando a caída dos servizos básicos.
Segundo UNICEF, polo menos un neno foi asasinado ou mutilado cada
día en 2014 e máis de 10.000 nenos foron recrutados por grupos
armados. Só na primeira metade de 2015 informouse de 26 nenos
mortos e 110 mutilados en enfrontamentos.
É probable que esta última
escalada de violencia empeore as condicións dos nenos do país,
moitos dos cales xa están a sufrir a interrupción dos servizos
sanitarios, niveis críticos de desnutrición infantil, escolas
pechadas e recrutamento forzoso por parte de grupos armados.
UNICEF está a traballar cos seus
aliados locais para protexer aos nenos da violencia
proporcionándolles espazos seguros de aprendizaxe e apoio
psicosocial para aqueles máis afectados. Tamén está en
conversacións cos grupos armados para garantir a liberación de
nenos e apoiarlles na súa reintegración nas súas comunidades cando
sexa posible.
A pesar das tremendas
necesidades, a resposta de UNICEF segue sufrindo un gran déficit de
financiamento. Até agora cóntase con menos da metade dos 73,9
millóns de dólares (66 millóns de euros) que se necesitan. A crise
en República Centroafricana é a que máis carece de fondos de todas
as emerxencias nas que UNICEF está a traballar en todo o
mundo.