Os nenos de Asia Oriental e Pacífico entre os máis vulnerables ao impacto do cambio climático

Os nenos da rexión aseguran que xa están a sentir o efecto deste fenómeno

O informe de UNICEF As vulnerabilidades dos nenos ao cambio climático e os impactos dos desastres en Asia Oriental e Pacífico, revela que os nenos son un dos grupos de poboación máis afectados polo cambio climático. Millóns de nenos en Asia Oriental e Pacífico sofren xa a falta de acceso a auga potable e saneamento axeitado, e son vulnerables ás crises alimentarias e a contraer enfermidades. O cambio climático non fará senón empeorar a súa situación.  

As principais causas de mortalidade infantil en todo o mundo son moi sensibles ao cambio climático. As altas temperaturas están ligadas a maiores taxas de desnutrición, cóleras, enfermidades diarreicas e enfermidades transmitidas por vectores como o dengue e a malaria, mentres que os nenos cun sistema inmunolóxico pouco desenvolvido teñen un risco moito maior de contraer estas enfermidades e sucumbir ás súas complicacións. O informe de UNICEF publicado hoxe presenta unha análise das tendencias do cambio climático e os impactos potenciais sobre os nenos en Asia Oriental e Pacífico, sobre a base dos resultados de cinco estudos encargados porUNICEF en Indonesia, Kiribati, Mongolia, Filipinas e Vanuatu. Así mesmo, incorpora os propios puntos de vista dos nenos sobre o cambio climático e outras investigacións. Este estudo recibiu o apoio da editorial Reed Elsevier, que traballa coas comunidades científicas e sanitarias na publicación de máis de 2.000 revistas, comoThe Lancet e New Scientist. "Os achados deste informe recórdannos a conexión que existe entre o cambio climático e outros desafíos aos que se enfrontan os nenos", sinalou Anupama Rao Singh, Directora Rexional de UNICEF para Asia Oriental e Pacífico. "Tamén nos recordan que as experiencias dos nenos e os riscos que afrontan en termos de saúde, educación e desenvolvemento son únicos. "

Aínda que o informe suxire que os impactos do cambio climático variarán dun país a outro, os nenos de todos estes países eran conscientes de que os cambios xa estaban a acontecer no seu ámbito. En Kiribati, os nenos dixeron aos investigadores que está a empeorar a erosión da costa. En Mongolia, os nenos alertaron de invernos máis duros e dunha diminución dos recursos hídricos. En Filipinas, os nenos falaron de períodos de chuvia máis intensos, e en Vanuatudunha maior contaminación da auga pola entrada de auga salgada. Nunha rexión onde un de cada catro nenos xa sofre atraso no crecemento por unha nutrición inadecuada, o informe suxire que os desastres máis frecuentes, como inundacións, ciclóns e secas, poderían ter un impacto negativo a longo prazo na produción agrícola, o que conduce á súa vez a un aumento dos prezos dos alimentos e das taxas de desnutrición.

A agricultura, vulnerable aos cambios de temperatura, as precipitacións e a salinidade da auga, supoñen máis do 50% dos medios de subsistencia da rexión de Asia-Pacífico, e unha parte importante do PIB da maioría dos países. Os nenos de Indonesia, Mongolia e Pacífico indicaron que o cambio climático afectou aos medios de subsistencia das súas familias e que, nalgúns casos, fixo que os seus pais os saquen da escola para axudarlles a recoller auga e combustible e aumentar os ingresos familiares. "Involucrar os nenos nas estratexias de adaptación e redución de desastres será fundamental para o éxito. Os nenos teñen unha perspectiva única sobre o seu ámbito, o que os converte nun actor vital na mellora da capacidade comunitaria para afrontar os riscos do cambio climático," afirmou Rao Singh. A realidade demostra que cando os nenos tiveron acceso a educación, información e están implicados, comparten esta información con outras persoas nas súas comunidades e están máis capacitados para prepararse e protexerse a si mesmos.

"Os impactos do cambio climático sobre as vidas e o benestar dos nenos son reais, e as políticas e decisións que se tomen hoxe marcarán a pauta nos próximos anos. Agora é o momento de poñer en marcha estratexias de adaptación que garantan que se abordan os riscos específicos para os nenos. Ao facelo, contribuiremos dalgunha forma a construír un mundo máis resistente ao cambio climático para os nenos", agregouRao Singh.