Os nenos constitúen unha quinta parte das mortes por cólera en Sudán do Sur

As escolas desempeñan un papel importante na prevención da propagación da enfermidade

Juba e Bor rexistraron ata agora máis de 700 casos de cólera que causaron 32 mortes -das cales unha de cada cinco son nenos menores de cinco anos-, informou hoxe UNICEF. A axencia de Nacións Unidas para a Infancia resalta o papel da educación para deter o brote de cólera en Sudán do Sur, e está a traballar cos nenos e profesores ao longo do país para concienciar sobre como previr a enfermidade e que non se propague aínda máis.

"A cólera é unha enfermidade mortal que afecta de xeito desmesurado aos nenos pequenos", dixo o representante de UNICEF en Sudán do Sur, Jonathan Veitch. "Unha das formas máis contundentes de responder a este brote é dando aos nenos en idade escolar a información e ferramentas que necesitan para protexerse a si mesmos e ás súas familias".

En Ecuatoria Central, onde está localizado o brote, os alumnos e profesores nas escolas próximas aos focos de cólera invitaron a UNICEF a facer visitas aos colexios para concienciar sobre os principais factores de risco. Uns 1.340 alumnos e 30 profesores xa se beneficiaron desta información vital, cuxo obxectivo é chegar a 150 escolas.

UNICEF e os seus aliados, incluídos a OMS e o Ministerio de Sanidade, están a traballar en todo o país para que as escolas estean á fronte da resposta. Os profesores e alumnos están a recibir formación sobre promoción da hixiene, como a importancia do lavado de mans con xabón e unha manipulación segura dos alimentos. Nos espazos amigos da infancia de UNICEF os nenos reciben formación e anímaselles a concienciar as súas propias familias e comunidades - unha importante medida en Sudán do Sur, onde o 70% dos adultos non sabe ler ou escribir. UNICEF e os seus aliados tamén están a difundir mensaxes para previr a cólera e organizan debates en 19 emisoras de raio, e poñen carteis en escolas e sitios públicos.

Ademais UNICEF está a dar resposta ao brote de cólera fortalecendo os servizos de saúde, distribuíndo xabón ás comunidades, levando a cabo campañas de vacinación nos asentamentos de protección de civís masificados e concienciando ás comunidades vulnerables sobre a prevención e detección temperá, mediante a formación a voluntarios, profesores e líderes relixiosos.

Veitch advertiu de que se este brote se expande máis alá da súa posición actual, especialmente aos estados afectados polo conflito, a carencia de servizos de saúde operativos podería levar unha perda desvastadora de vidas. Actualmente 184 instalacións sanitarias pecharon ou foron destruídos nas zonas afectadas polo conflito.

"É unha carreira contra o reloxo para previr a propagación da cólera polo río Nilo, especialmente durante a estación de chuvias. Agora a nosa prioridade é chegar aos nenos máis vulnerables que necesitan con urxencia auga potable e vacinas".

UNICEF en Sudán do Sur necesita urxentemente 4,6 millóns de dólares (preto de 4,2 millóns de euros) para financiar a resposta de emerxencia á cólera durante seis meses.

Para acceder a vídeos e fotos:

ftp://video.unicef.es/sudandelsur/

Usuario:        Refcom

Contrasinal:   uce442087