O número de nenas casadas en África podería chegar a 310 millóns en 2050, máis do dobre da cifra actual

O informe estatístico de UNICEF, titulado A Profile of Child Marriage in Africa (A situación do matrimonio infantil en África), indica que a debilidade das taxas de redución, combinada co crecemento acelerado da poboación, é a principal causa do aumento proxectado. En todas as demais rexións do mundo, debido ás súas taxas actuais de redución e tendencias demográficas, haberá menos nenas casadas cada ano. En 2050 África superará a Asia meridional como a rexión co maior número de mulleres de 20 a 24 anos que casaron sendo nenas.

 

"O matrimonio infantil xera unha serie de normas que resultan cada vez máis difíciles de exterminar; normas que socavan o valor das nosas mulleres", dixo a presidenta da Comisión da Unión Africana, Nkosozana Dlamini Zuma. "A través dunha maior concienciación, xunto cun enfoque que implique a todos, será posible erradicar os efectos daniños do matrimonio infantil".

 

En África, a porcentaxe de mulleres novas que casaron cando eran nenas descendeu do 44% en 1990 ao 34% actual. Espérase que a poboación total de nenas aumente en África dos 275 millóns que hai hoxe a 465 millóns en 2050. Por iso é necesario adoptar medidas moito máis ambiciosas, xa que mesmo aínda que se duplicase a taxa actual de redución dos matrimonios infantís, o número de nenas casadas seguiría aumentando.

 

O progreso tamén foi profundamente desigual: a probabilidade de que unha nena do quintil máis pobre case durante a súa infancia é tan alta hoxe como o era hai 25 anos.

 

Cando as nenas casan, as súas perspectivas de levar unha vida saudable e exitosa diminúen drasticamente, e a miúdo xérase un ciclo de pobreza intergeneracional. As nenas casadas teñen menos probabilidades de terminar a escola e máis posibilidades de ser vítimas da violencia e de contraer o VIH/SIDA. Os nenos nados de nais adolescentes teñen un maior risco de nacer mortos, de morrer pouco despois de nacer e de ter baixo peso ao nacer. As nenas casadas adoitan carecer das habilidades necesarias para obter emprego.

 

A Unión Africana presentou en maio pasado unha campaña en todo o continente para pór fin ao matrimonio infantil. Posteriormente presentouse un plan de acción para os gobernos destinado a reducir as taxas de matrimonio infantil mediante un aumento do acceso das nenas á inscrición dos nacementos, a educación de calidade e os servizos de saúde reprodutiva; outra parte do plan consistía en fortalecer e facer cumprir as leis e políticas que protexen os dereitos das nenas e prohiben o matrimonio antes dos 18 anos.

 

"O número de nenas afectadas -e o que isto significa en termos de infancias perdidas e de futuros destruídos- subliña a urxencia de prohibir a práctica do matrimonio infantil dunha vez por todas", dixo o director executivo de UNICEF, Anthony Lake. "Os datos tamén indican claramente que pór fin ao matrimonio infantil require un enfoque máis orientado a chegar ás nenas máis pobres e marxinadas -aquelas que están máis necesitadas e en maior situación de risco- con servizos educativos e de protección de calidade. As súas vidas, e o futuro das súas comunidades, están en xogo. Cada nena casada é unha traxedia individual. Un aumento no seu número é intolerable".