O número de mulleres e nenos que cruzan Macedonia para buscar refuxio en Europa triplícase en tres meses
O número de mulleres e nenos que foxen da violencia nos seus países de orixe e cruzan a antiga República Iugoslava de Macedonia en busca de asilo en Europa triplicouse nos últimos tres meses, dixo hoxe UNICEF.
Estímase que unhas 3.000 persoas pasarán cada día a través da
antiga República Iugoslava de Macedonia. Un terzo deles son
mulleres e nenos, (en xuño a porcentaxe situábase en torno ao 10%).
Arredor do 12% das mulleres están embarazadas.
Segundo as cifras do Ministerio do Interior da antiga República
Iugoslava de Macedonia, o 80% procede de Sirya, mentres que o 5%
son de Afganistán e outro 5% é de Iraq.
Dende o mes de xuño máis de 52.000 persoas rexistráronse no Centro
de Recepción da fronteira
en Gevgelija,
á que entraron dende Grecia. Estímase que outros moitos están en
tránsito polo país sen rexistrarse.
Moitas familias levan viaxando meses cos seus fillos, soportando
días baixo un sol abrasador, chegando só coa roupa e o calzado que
levan. Están exhaustos fisicamente e necesitan desesperadamente un
lugar para descansar. Moitos sofren deshidratación, ampolas,
arrefriados, diarrea e queimaduras solares.
A pesar dos grandes esforzos do goberno e dos aliados no terreo,
incluíndo ACNUR,
estas familias necesitan máis auga e un mellor acceso ás
instalacións de hixiene e saneamento. Moitos están profundamente
angustiados e algúns necesitan asistencia médica.
UNICEF está
a enviar á cidade de Skopje depósitos
de auga e dúas carpas de 72 metros cadrados. Os depósitos, cada un
con capacidade para 30.000 litros, permitirán as persoas que se
dirixen ao centro o acceso a auga potable, que agora está limitado
a auga embotellada. Esta auga tamén pode ser usada para lavarse, xa
que aínda non se instalaron lavabos. As carpas usaranse como
espazos amigos da infancia. Xa hai un espazo amigo da infancia, que
pode atender a 50 nenos e proporcionarlles materiais educativos, de
arte e de ocio. Dende que se instalou, o 23 de agosto, recibiu
1.200 nenos. UNICEF tamén
está a proporcionar aos nenos a comida que tanto necesitan.
Independentemente do seu status, os nenos que se están a desprazar
entre as fronteiras, coas súas familias ou sós, deberían recibir
unha protección e axuda axeitadas. As súas solicitudes do status de
refuxiado deberían ser procesadas de xeito rápido e xusto nos
cruzamentos fronteirizos, cun seguimento e aplicación apropiados.
As autoridades en Europa deberían aplicar as leis e políticas
existentes para salvagardar e protexer os dereitos dos
nenos.
UNICEF está
a facer seguimento da situación no terreo e está a traballar coas
autoridades locais para garantir a protección dos
nenos. UNICEF continúa
avogando por que todas as accións destinadas aos nenos emigrantes
estean guiadas polo interese superior do neno, en cada paso do
camiño.
Para acceder a vídeos e fotos:
ftp://video.unicef.es/crisis_mediterraneo
Usuario: Refcom
Contrasinal: uce442087
Nota aos xornalistas:
A mediados de ano UNICEF propuxo un plan de 10 puntos para orientar á Unión Europea sobre o interese superior do neno.