Nacións Unidas manifesta a súa satisfacción pola liberación de 21 nenos soldado por parte do goberno de Sudán
Nacións Unidas acolle con satisfacción a liberación onte de 21 nenos soldado por parte do goberno de Sudán, presuntamente vinculados a grupos armados.Estes nenos, que estiveron baixo custodia das forzas de seguridade do goberno, foron capturados durante os enfrontamentos entre o goberno de Sudán e o Movemento pola Xustiza e a Igualdade en Darfur, en 2015.
"Con gran alegría recibimos o
anuncio da liberación destes nenos. É un claro resultado da
determinación do goberno por buscar a protección dos nenos
afectados polo conflito no país. Nacións Unidas aproveita esta
oportunidade para reiterar o seu pleno apoio ao goberno promovendo
e protexendo os dereitos dos nenos en Sudán, mesmo en zonas en
conflito armado", afirma Marta Rodas, coordinadora residente de
Nacións Unidas.
Nacións Unidas considera a
liberación deste grupo un paso adiante importante cara á
implementación do Plan de Acción asinado entre Nacións Unidas e o
goberno de Sudán o 27 de marzo de 2016. O documento busca
contribuír á protección integral de todos os nenos afectados por
conflitos armados en Sudán, e especificamente á protección e
prevención do seu recrutamento e utilización, así como á súa
liberación, reintegración e rehabilitación.
"Non se lles pode seguir roubando
o futuro aos nenos sudaneses. Ningún neno debería participar nas
hostilidades. Os nenos deben estar no colexio e coas súas familias.
Recibo con satisfacción a liberación destes nenos, como un xesto
significativo e de novo fago un chamamento a todas as partes no
conflito armado a deter o recrutamento de nenos soldado", valorou o
representante especial conxunto Martin Uhomoibhi, xefe da
UNAMID.
Os nenos serán aloxados nun
centro de tránsito gobernamental onde recibirán apoio psicosocial
ademais dos apoios que lles permitan reintegrarse
satisfactoriamente nas súas familias e comunidades. Nacións Unidas
está a traballar estreitamente co Consello Nacional para o Benestar
Infantil do goberno para apoiar o proceso.
"Hoxe é un día verdadeiramente
extraordinario! Esta liberación é o reflexo dun compromiso
colectivo co Plan de Acción para a protección de todos os nenos que
viven en conflitos. A reunificación coas súas familias e a súa
reintegración na sociedade será un fito moi importante na
materialización e preservación dos dereitos dos nenos. Faremos
todos os esforzos posibles para apoiar ao goberno e as súas
institucións máis relevantes para reintegrar a estes nenos",
declara Abdullah Fadil, representante de UNICEF en Sudán.
A exitosa reintegración destes
nenos nas súas comunidades, que foron asociados con grupos e forzas
armadas, segue sendo un obxectivo moi importante para Nacións
Unidas e os seus aliados en Sudán.
Notas aos editores:
- O Plan de Acción foi asinado
polo goberno de Sudán, e en nome de Nacións Unidas polo coordinador
residente e coordinador humanitario de UNAMID e UNICEF.
O Plan de Acción propón unha
folla de ruta detallada para asistir ao goberno de Sudán a mellorar
a protección integral dos nenos afectados polos conflitos armados,
consistente cos Principios e Directrices sobre os nenos vinculados
a forzas ou grupos armados de 2007.
- Isto inclúe o cesamento do
recrutamento e conscripción de nenos por parte das forzas de
seguridade do goberno, a prevención do recrutamento no futuro, e
asegurar a liberación de nenos na súa soberanía territorial.
- O desarmamento, desmovilización
e reintegración foi establecido en 2011 a través do Documento para
a Paz en Darfur de Doha (DDPD)
Acerca de UNICEF
UNICEF promove os dereitos e o benestar de todos os nenos e nenas en todo o que facemos. Xunto aos nosos aliados, traballamos en 190 países e territorios para transformar este compromiso en accións prácticas, centrando especialmente os nosos esforzos en chegar aos nenos máis vulnerables e excluídos para o beneficio de todos os nenos, en todas partes.