Millóns de nenos en Sirya están en alto risco de contraer enfermidades pola escaseza de auga e a intensa calor
A diminución de subministracións de auga potable durante o verán abrasador está a expoñer os nenos á ameaza de enfermidades transmitidas a través da auga, segundo advirte UNICEF.
Dende comezos de ano Sirya rexistrou 105.886 casos de diarrea
aguda. Tamén se produciu un forte aumento dos casos de
hepatite A,
que en febreiro alcanzaron a cifra récord de 1.700 en só unha
semana.
A intensificación do conflito ao longo do país causou novas ondadas
de poboación desprazada, o cal incrementou a presión sobre a xa
fráxil rede de auga e saneamento.
"A situación é preocupante sobre todo para os nenos, que son
especialmente vulnerables ás enfermidades transmitidas pola auga,"
di Hanaa
Singer,
representante de UNICEF en
Sirya. "Neste quinto ano de crise a auga é cada vez máis escasa e
insalubre, e as malas condicións hixiénicas -en particular nas
comunidades de desprazados- están poñendo máis nenos en grave
perigo".
Unha das zonas onde o risco de brotes de enfermidades é
particularmente alto é Deir-Ez-Zour,
no leste. Os informes indican que as augas residuais están a
contaminar gravemente o río Éufrates,
do cal depende o abastecemento de auga da poboación. Nesta área
informouse de 1.144 casos de tifo.
O alto prezo do combustible é outro factor que inflúe no acceso á
auga por parte dos civís. En Idleb,
ao oeste de Sirya, triplicouse a 500 libras sirias (2,3 euros) o
litro. Ademais, as estacións de bombeo de auga están operativas
durante só dúas horas ao día, o que reduce a dispoñibilidade de
auga a só 20 litros diarios por persoa.
Outro feito preocupante é o peche do cruzamento fronteirizo con
Xordania, que está a afectar á distribución de subministracións
fundamentais de auga en Sirya. Antes do peche a mediados de
abril, UNICEF utilizaba
este paso para distribuír cada mes unha media de medio millón de
litros de material de tratamento de auga. Como resultado, as
existencias dentro de Sirya estanse a esgotar.
"Dende o comezo da crise traballamos cun amplo número de aliados
para dar apoio á infraestrutura de auga necesaria, da que dependen
15 millóns de persoas en Sirya", di Singer.
"Isto incluíu a perforación e dotación de pozos como fontes
alternativas de auga cando o principal provedor falla, así como o
apoio á produción local e a adquisición de subministracións de
tratamento da auga,".
UNICEF pide
urxentemente 5 millóns de dólares (4,4 millóns de euros) ata finais
de agosto para a súa resposta de auga, saneamento e hixiene dentro
de Sirya.