Mensaxe na Semana Mundial da Lactación Materna
Lactación materna e Traballo - Fagamos que funcione!Cada ano, a comunidade internacional dedica unha semana a chamar a atención sobre a vital importancia que a lactación materna ten, non só nas vidas dos nenos máis vulnerables senón tamén para fortalecer as sociedades. O tema deste ano da Semana Mundial da Lactación Materna, Lactación materna e Traballo - Fagamos que funcione!, pon o foco no que podemos facer para axudar millóns de nais traballadoras a que poidan dar aos seus bebés o mellor comezo posible na súa vida, apoiando políticas máis fortes que promovan a lactación materna nos lugares de traballo.
Sabemos que a lactación materna axuda aos nenos a sobrevivir e
desenvolverse, permitíndolles resistir infeccións,
proporcionándolles nutrientes críticos para o desenvolvemento
temperán dos seus cerebros e corpos, e fortalecendo o lazo entre as
nais e os seus bebés. E os beneficios da lactación materna duran
toda a vida. Un estudo recente de Lancet mostrou
que os nenos que foran aleitados polo menos durante un ano puideron
permanecer na escola máis tempo, tiveron mellores resultados nas
probas de intelixencia, e tiveron maiores ingresos sendo adultos
que aqueles que só recibiron lactación materna durante un
mes.
A pesar desta crecente evidencia, só un 38% dos nenos no mundo
reciben lactación materna exclusiva, recomendada durante os seis
primeiros meses de vida. E aínda que as taxas de lactación materna
aumentaron en todas as rexións do mundo, o progreso global
detívose.
A Asemblea Mundial da Saúde estableceu o obxectivo global de
aumentar as taxas de lactación materna exclusiva para nenos menores
de seis meses polo menos ao 50% en 2025. Para alcanzar este
ambicioso e moi importante obxectivo, necesitamos eliminar todas as
barreiras á lactación materna.
Os gobernos deberían liderar o cambio facendo da lactación materna
unha prioridade política nos plans de desenvolvemento nacional,
aumentando os recursos para os programas que apoian a lactación, e
traballando coas comunidades e familias para promover os beneficios
da lactación materna.
Pero deberiamos facer aínda máis para superar o obstáculo que
prevén potencialmente a millóns de mulleres de dar o peito: as
políticas nos lugares de traballo que non apoian o dereito das nais
traballadoras a aleitar os seus bebés no traballo.
Na actualidade, de aproximadamente 830 millóns de mulleres
traballadoras no mundo, a maioría non se beneficia de políticas nos
lugares de traballo que apoien ás nais que dan o peito. E esta
cifra non inclúe mulleres que traballan informalmente, de forma
estacional ou con traballo a tempo parcial, frecuentemente as
mulleres máis pobres nos países máis pobres, que poden ter que
facer fronte a barreiras mesmo maiores para continuar coa lactación
materna.
Isto non é só unha perda para as nais traballadoras e os seus
bebés. Tamén é unha perda para os empregadores. As nais
traballadoras con beneficios axeitados á maternidade, como un lugar
de traballo que apoie a lactación, teñen maior satisfacción co seu
traballo e maior lealdade cara a quen as emprega. Os nenos que
recibiron lactación materna enferman con menos frecuencia, co cal
as súas nais tamén faltan menos ao seu traballo. Estes efectos
contribúen a unha maior produtividade, beneficiando basicamente ás
empresas e economías ás que contribúen.
Recoñecendo estas conexións, a Organización Internacional do
Traballo adoptou tres Convencións para establecer medidas
protectoras para as mulleres embarazadas e futuras nais, que
inclúen o dereito a continuar coa lactación materna e promover
opcións factibles para as mulleres que están fóra do traballo
formal. A nivel mundial, 67 países ratificaron polo menos unha das
tres Convencións que protexen a maternidade. Máis gobernos deberían
unirse a este movemento crecente e actuar para implementar estas
importantes proteccións.
Sabemos que a lactación materna mellora a vida de millóns de nenos
e basicamente beneficia ás familias, comunidades e ás sociedades. O
noso reto agora é facer que a lactación materna tamén funcione nos
lugares de traballo. Xuntos podemos axudar ás mulleres
traballadoras a dar o peito e obter os beneficios para elas mesmas,
para os seus nenos e para a saúde e o benestar das futuras
xeracións.
Mr. Anthony Lake Dr. Margaret Chan
Director Executivo UNICEF Directora Xeral OMS