Fernando Alonso visita un hospital infantil con UNICEF en India e fai un chamamento pola erradicación da polio

Fernando Alonso visita un hospital infantil con UNICEF en India e fai un chamamento pola erradicación da polio

"Todos os nenos teñen dereito a correr, xogar e vivir unha vida sa sen poliomielitis", dixo hoxe Fernando Alonso, bicampión do mundo de Fórmula 1, piloto de Ferrari e Embaixador de UNICEF España, durante unha visita ao hospital infantil Chacha Nehru Bal Chikitsalaya, onde fixo agasallos por Diwali, festividade hindú, a nenos afectados por parálises.
 

"Horas despois de chegar a India para o campionato de F1, Alonso compartiu máis dunha hora cos nenos deste hospital pediátrico no leste de Delhi. Fernando entregou agasallos aos nenos en varias salas do hospital, incluíndo a sala de fisioterapia do Centro de Desenvolvemento Infantil e conseguindo sorrisos nos rostros dos nenos enfermos.

"A polio é unha enfermidade terrible, de consecuencias catastróficas para os nenos, podemos e debemos erradicala do planeta", dixo o Embaixador de UNICEF España.

Despois de compartir uns momentos  cos nenos, Alonso vacinou a cinco deles coa vacina oral contra a polio. "Estou orgulloso de estar aquí vacinando a nenos contra a poliomielitis", dixo. "É fundamental que todos os nenos de India continúen sendo vacinados, ata que esta enfermidade fose erradicada en todo o mundo. Todos esperamos que ocorra pronto".

Destacando os esforzos de India na carreira contra a poliomielitis, cun só caso rexistrado este ano -fai xa máis de nove meses- Alonso dixo: "Desexo todo o éxito a India na súa loita contra a polio".

Como Embaixador de UNICEF España, Alonso colabora habitualmente na causa da infancia, particularmente en Brasil, onde visitou centros xuvenís en favelas en dúas ocasións. A de hoxe foi a súa primeira visita con UNICEF en India.

Este ano India rexistra notables progresos contra a polio. Por primeira vez na historia, non se reportou ningún caso durante case nove meses consecutivos. O último caso foi en Howrah, o pasado 13 de xaneiro. Os estados indios con maior incidencia de polio son Uttar Pradesh -que alberga o Circuíto Internacional de Buddha Race - e Bihar, que non reportaron ningún caso desde fai máis dun ano. O ano pasado India rexistrou 42 casos de polio, unha importante mellora fronte aos 741 casos de 2009.

 Este avance sen precedentes conseguiuse grazas aos esforzos concertados, intensos e concentrados nos últimos anos dos gobernos da Unión e o Estado e dos aliados para a erradicación da poliomielitis: UNICEF, a OMS e Rotary International.

Para erradicar a poliomielitis en India, é moi importante que todos os nenos até a idade de 5 anos tomen as pingas contra a poliomielitis na campaña do próximo 13 de novembro e en todas as roldas seguintes.