A falta de acceso á hixiene pode pór en perigo a nova axenda para o desenvolvemento, di UNICEF
As taxas de lavado de mans son inferiores nos países de baixos ingresos
A pesar dos beneficios que demostrou ter sobre a saúde infantil, a práctica de lavarse as mans con xabón atópase nun nivel perigosamente baixo en moitos países, informa UNICEF.
O oitavo Día Mundial do Lavado de
Mans celébrase menos dun mes despois de que as Nacións Unidas
aprobasen os Obxectivos de Desenvolvemento Sustentable, que por
primeira vez incorporan a hixiene a esta axenda mundial. Unha das
metas dos ODS é "lograr un acceso adecuado e equitativo a servizos
de saneamento e hixiene para todos"en 2030.
Segundo UNICEF as melloras na
hixiene deben producirse ao mesmo tempo que os avances no acceso á
auga e saneamento; en caso contrario, os nenos seguirán sendo
vítimas de enfermidades facilmente prevenibles como a
diarrea.
"Xunto coa auga potable e o
acceso aos aseos, a hixiene -especialmente o lavado de mans con
xabón- é o terceiro fundamento esencial da meta sobre auga e
saneamento-, dixo Sanjay Wijesekera, xefe mundial dos programas de
auga, saneamento e hixiene de UNICEF. "Dende o nacemento -cando as
mans sen lavar das parteras poden transmitir patógenos perigosos- e
na infancia, a escola e máis aló, o lavado de mans é fundamental
para a saúde do neno. É unha das intervencións de saúde máis
baratas, simples e eficaces que temos".
África subsahariana, a rexión
coas taxas de mortalidade infantil máis altas do mundo, ten niveis
especialmente baixos de lavado de mans. Segundo o último informe de
UNICEF e a Organización Mundial da Saúde (OMS), en 38 países da
rexión con datos dispoñibles os niveis son, como moito, do
50%.
Incluso os centros de atención
sanitaria carecen a miúdo de lugares para o lavado de mans. Ao
redor do 42% deste tipo de instalacións na rexión de África da OMS
carecen de fontes de auga dispoñible a menos de 500 metros.
Segundo as últimas estimacións de Nacións Unidas, máis
de 800 das aproximadamente 1.400 mortes infantís por diarrea que se
producen diariamente poden atribuírse á falta de auga, saneamento
ou hixiene. No seu primeiro mes de vida os nenos son especialmente
vulnerables ás enfermidades transmitidas polas mans sen
lavar.
O Día Mundial do Lavado de Mans
celébrase cunha serie de actividades en todo o mundo, e o seu
obxectivo é ensinar a importancia do lavado de mans con xabón,
especialmente aos nenos.
§ República
Democrática do Congo: celébrase un concurso nacional de
debuxo sobre o lavado de mans, no que participarán 300.000 alumnos
de 1.500 escolas; as mensaxes chegarán a 3 millóns de persoas en
5.500 aldeas.
§ Haití:
está previsto un partido de fútbol (Mans Limpas contra Mans
Sucias), así como un desfile, anuncios nas radios comunitarias,
cancións, poemas, un concurso de debuxo e demostracións públicas de
lavado de mans.
§ Kiribati:as 94 escolas primarias, 24 secundarias e 16 secundarias superiores
do país participarán nunha cerimonia de lavado de mans en grupo. Os
estudantes deseñarán carteis e pancartas, e promoverán o lavado de
mans con marchas, cancións, bailes, teatro, discursos, poemas e
traballos de arte.
§ Sri Lanka:o goberno de Sri Lanka está a organizar un intercambio de
aprendizaxe dunha semana entre as escolas para establecer as
mellores prácticas para os programas en toda Asia e o Pacífico. O
Embaixador de UNICEF para Asia meridional, o xogador de cricket
Sachin Tendulkar, participará na promoción da importancia do lavado
de mans.
§ Vietnam:8.000 nenos participarán nun acto cuxo obxectivo é que animen ás
súas familias a practicar o lavado de mans con xabón.
Más información:
Rita Ann Wallace, UNICEF Nova York, +1 2123267586, 1 917-213-4034, [email protected]
Belén de Vicente, UNICEF España, 609 160 051 / 91 378 95 55 [email protected]