Explotación sexual, tráfico e abuso ameazan a vida dos nenos nos campos do Norte de Francia
Os nenos sofren explotación sexual, violencia e traballos forzados de forma cotiá nos campos do norte de Francia, de acordo cos resultados dun novo estudo realizado por UNICEF Comité Francés e UNICEF Comité Reino Unido.
Os testemuños dos nenos ofrecen unha fotografía de abuso e traxedia, que inclúe casos de escravitude por débedas e actividades criminais forzadas, por exemplo asistencia a contrabandistas nos peiraos. A violencia sexual é unha ameaza constante, incluíndo a explotación sexual e violación de mozos, e a violación e prostitución forzada de nenas. Durante as entrevistas, as novas mulleres confirmaron prácticas de intercambio de favores sexuais pola promesa dunha pasaxe ao Reino Unido ou de acelerar a súa viaxe.
Moitos destes nenos fuxiron de
conflitos e están agora atrapados nos distintos campamentos e
asentamentos. Moitos deles están desesperados por reunirse coa súa
familia que xa vive en Reino Unido, onde hai unha cama que lles
espera.
O estudo entrevistou a 60 nenos
non acompañados de entre 11 e 17 anos - de Afghanistán, Exipto,
Eritrea, Etiopía, Irán, Iraq, Kuwait, Siria e Vietnam - sobre o seu
camiño até o norte de Francia, e a súa vida en 7 campos, entre
xaneiro e abril de 2016.
Para alcanzar Francia, as sumas
de diñeiro varían de entre 2.700 a 10.000 euros. Sexa cal for a
forma ou o prezo pago, o camiño é extremadamente perigoso e a
experiencia, tal e como a contan, traumática. Na maioría dos campos
ademais, os traficantes cobran unha "cota de entrada" para permitir
que os menores queden.
As queixas polo frío e o cansazo
son comúns debido ás desalentadoras condicións de vida, os nenos
están expostos constantemente aos elementos. Non hai acceso a
educación regular a pesar de que é obrigatorio. Algúns nenos
expresaron a súa vontade de ser hospitalizados nun centro
psiquiátrico tras sufrir colapsos mentais e episodios agresivos e
violentos.
Pero máis aló das duras
condicións de vida, o máis preocupante é a violencia ás que ven
expostos: a miúdo forzados a traballar para os traficantes, os
nenos e mozos non acompañados son os máis expostos a todo tipo de
violencia. As primeiras preocupacións que expresan nas entrevistas
son relativas á violencia exercida polas forzas de seguridade, as
milicias de civís e os traficantes, así como ás agresións sexuais
que sofren tanto os nenos como nenas. Da investigación
despréndense indicios claros de que hai situacións de trata de
seres humanos.
Para Sebastien Lyon, director
xeral de UNICEF Francia: "a creación de espazos de protección,
permitindo dar información no seu idioma e adaptada á súa idade é
primordial para todos os nenos sós que van seguir chegando a
Francia. Co fin de que non vivan o que viviron os nenos non
acompañados no inverno de 2015"
Os traficantes cobran agora entre
entre 5.000 e 7.000 EUR por persoa para cruzar a Canle da Mancha -
nunca antes pediuse un prezo tan elevado. Ademais, debido a unha
maior presenza das forzas de seguridade, a situación empuxou aos
nenos a mans destes traficantes, ou lles forzou a asumir maiores
riscos para pasar sen pagar -nalgúns casos escondéndose eles mesmos
en camións frigoríficos.
O director executivo adxunto de
UNICEF Reino Unido di que ?unha acción inmediata por parte do
Goberno do Reino Unido podería impedir que estes nenos sigan caendo
en mans dos traficantes, e demostrar a súa seriedade respecto dos
compromisos recentemente adquiridos cos nenos refuxiados?.
"O primeiro ministro di que os
nenos non acompañados deberían ser traidos ao Reino Unido se as
súas familias están aquí a través dos procesos de reunificación
familiar, pero estes procesos avanzan con demasiada lentitude.
Estes campos non son lugar para nenos -sabemos que hai polo menos
157 nenos en Calais con dereito recoñecido a estar coas súas
familias en Reino Unido".
"Canto máis tempo teñan que
esperar estes nenos, máis desesperados poden chegar a estar e máis
fácil será que arrisquen as súas vidas fuxindo das terribles
condicións dos campos, para reunirse coas súas familias".
O informe estima que, en marzo de
2016, había 500 nenos non acompañados vivindo en 7 puntos do Norte
de Francia, incluíndo Calais e Dunkerque, e que aproximadamente
2.000 nenos sós atravesaron a Canle da Mancha desde xuño de
2015.
Permanecen de media 5 meses
nestas "xunglas", pero algúns dos nenos levan, polo menos, 9 meses
e un deles está alí desde fai máis dun ano. Con todo, esta media
crece con rapidez debido a un aumento da seguridade nas fronteiras
e unha maior dificultade de emprender estas travesías. Canto máis
tempo permanezan os nenos nestes campos, máis tempo estarán
expostos a cada vez máis perigos.
A protección dos menores non
acompañados é unha obrigación para os Estados, como queda
establecido na Convención dos Dereitos do Neno. Pero a resposta que
se está danto é moi limitada e os procesos non teñen como obxectivo
central o interese superior do neno.
UNICEF Comité Francés e UNICEF
Comité Británico fan un chamamento aos seus respectivos gobernos
para intensificar os seus esforzos de protección de todos os nenos
e traballar porque os nenos non acompañados poidan reunirse canto
antes coas súas familias.
Esta semana UNICEF publicouUn perigo en cada etapa do
camiño, un informe sobre as rutas por que toman os nenos
para chegar a Europa. Nel ponse de relevo os perigos que enfrontan
os nenos refuxiados non acompañados, incluídos os que viaxan desde
Libia a Italia.
Acerca de UNICEF
UNICEF promove os dereitos e o
benestar de todos os nenos e nenas en todo o que facemos. Xunto aos
nosos aliados, traballamos en 190 países e territorios para
transformar este compromiso en accións prácticas, centrando
especialmente os nosos esforzos en chegar aos nenos máis
vulnerables e excluídos para o beneficio de todos os nenos, en
todas partes.