España debe reducir a menos de 5 millóns o número de persoas en risco de exclusión social para o ano 2030
Oxfam Intermón e UNICEF España presentan o informe "España fronte aos retos da Axenda de Desenvolvemento Sustentable", que propón medidas aos partidos políticos para cumprir cos Obxectivos de Desenvolvemento SustentableEspaña debe asegurar que os países en desenvolvemento contan cos recursos que faciliten o cumprimento desta axenda e incrementar a axuda ao desenvolvemento ao 0,7% no ano 2023
A Axenda 2030 para o
Desenvolvemento Sustentable que se aproba na Asemblea Xeral de
Nacións Unidas, do 25 ao 27 de setembro, establece un programa de
acción que, por primeira vez, compromete a todos os países do mundo
a cumprir unhas metas durante o próximos quince anos.
Por iso Oxfam Intermón, co apoio
de UNICEF España, presentou o informe España fronte aos
retos da Axenda de Desenvolvemento Sustentable, cuxo obxectivo
é propor aos partidos políticos unha serie de medidas para facer
efectiva a posta en marcha da Axenda 2030.
A universalidade da axenda obriga
a España a cumprir con estes obxectivos e coas súas metas e o seu
punto de partida non é moi alentador. En 2014 o 29,2% da
poboación española estaba en risco de pobreza ou exclusión social;
deles un 35,8% eran menores de 18 anos, segundo datos oficiais. As
medidas de austeridade realizadas en saúde e educación tiveron un
impacto negativo, en particular nos grupos máis vulnerables. A
brecha salarial de xénero é das maiores da Unión Europea e a
implementación do protocolo de Kioto na emisión de gases
invernadoiro tivo un débil percorrido. Ademais, España está á cola
do Comité de Axuda ao Desenvolvemento pola estrepitosa caída da
Axuda Oficial ao Desenvolvemento (AOD) a só o 0,14 por cento do
PNB.
Segundo o informe, o noso país
debería reducir á metade os niveis de pobreza para 2030, respecto
dos do ano 2000, e alcanzar a meta de menos de 5 millóns de persoas
en risco de pobreza e exclusión social para poder cumprir coa
axenda de Obxectivos de Desenvolvemento Sustentable (ODS). Ambas as
organizacións propoñen para iso medidas como o establecemento dun
sistema de garantía duns ingresos mínimos para que os fogares e
persoas que o necesiten poidan cubrir as súas necesidades
básicas.
A Axenda 2030 expón por primeira
vez un obxectivo de redución da desigualdade que todos os países
deben alcanzar e que supón que para o ano 2030 un país como España
debe conseguir que o 40%da poboación máis pobre teña máis riqueza
que o 10% da poboación máis rica. Para logralo, as organizacións
propoñen medidas fiscais progresivas onde paguen máis os ricos e as
grandes empresas, e medidas salariais orientadas a reducir a brecha
salarial entre os salarios máis altos, os medios e os baixos.
España tamén ten o deber de
asegurar que os países en desenvolvemento contan cos recursos e as
políticas que faciliten o cumprimento desta Axenda, polo que ten
que pór en marcha medidas para loitar contra a pobreza, a
desigualdade e pola sustentabilidade fóra das nosas fronteiras. Por
tanto, debe reverter o proceso de enfraquecemento da política de
cooperación para o desenvolvemento, tan esencial para a consecución
dos ODS nos países en desenvolvemento. O ODS 17 establece a
necesidade de incrementar a axuda ao desenvolvemento até o 0,7% do
PNB.
"É un momento histórico para que
España e o novo Goberno que salga das urnas expoña un plan de
acción de implementación desta axenda que marque indicadores
concretos para reducir a pobreza e a desigualdade a nivel
doméstico, pero tamén que priorice a contribución do noso país a
que os países en desenvolvemento poidan chegar a estes obxectivos",
declara Chema Beira, Director de Oxfam Intermón. "Para iso en
necesario un maior compromiso de fondos e garantir unha
gobernabilidade internacional máis xusta".
Así mesmo, o estudo recomenda que
se debe reducir a menos de 1,1 millóns o número de nenos en risco
de pobreza ou exclusión social. Para iso proponse a adopción dun
Pacto de Estado pola Infancia que inclúa un aumento do gasto
social, axudas universais por fillo ou a mellora de axudas e
servizos públicos para a infancia, especialmente a máis
vulnerable.
"Investir na infancia é
imprescindible", afirma Javier Martos, director executivo de UNICEF
Comité Español, "non só para garantir o benestar e os dereitos dos
nenos hoxe, senón tamén para asegurar o futuro das sociedades, como
recoñece a Axenda 2030". Isto suporía "aumentar o investimento
público en España en políticas de protección social das familias e
a infancia, que actualmente é o 1,4% do PIB, e aproximala á media
da Unión Europea (2,2%) en 2020".
Garantir unha educación
inclusiva, lograr a igualdade de xénero e a loita contra o cambio
climático son outros obxectivos que os países teñen que cumprir até
2030. Para cumprir esas metas, Oxfam Intermón e UNICEF Comité
Español expoñen ao goberno a necesidade de pór en marcha
iniciativas como construír un acordo social pola educación pública,
reducir a brecha salarial entre homes e mulleres e ampliar as
medidas de conciliación da vida familiar e laboral, reducir a
emisión de gases invernadoiro e investir máis en enerxías
renovables.
Os gobernos do mundo, incluído o
de España, deberán aplicar a Axenda 2030 nas súas políticas
domésticas e da cooperación internacional para alcanzar os 17 ODS e
as 169 metas, e xerar así mellores oportunidades e benestar para
todos.
O novo Goberno que salga das
urnas ao final deste ano deberá definir unha folla de ruta referida
á Axenda 2030, cunha concreción dos compromisos para a
lexislatura.