Día Universal do Neno: dar a todos os nenos unha oportunidade
UNICEF urxe a reducir as desigualdades, a investir en infancia e chama a atención sobre o risco de desprotección que actualmente viven os nenos refuxiados e migrantesNo Día Universal do Neno, UNICEF presentou o informe Para cada neno, unha oportunidade. A promesa da equidade que mostra que, a pesar dos grandes avances desde a adopción da Convención sobre os Dereitos do Neno en 1989, o mundo segue sendo un lugar profundamente inxusto para os nenos e nenas máis pobres e desfavorecidos.
O informe presenta un resumo
estatístico que reflicte, con respecto aos índices básicos de
desenvolvemento humano, o escaso avance que se produciu nos nenos
en situación de marxinalidade. Defende reducir as disparidades,
argumentando que investir en infancia, particularmente na máis
vulnerable, é un principio xusto e correcto na práctica e que tal
investimento supón múltiples beneficios non só para os nenos senón
tamén para as súas familias, comunidades e economías.
"A desigualdade no acceso a
oportunidades para os nenos condena aos máis vulnerables, en
diferentes partes do mundo e en múltiples contextos, a unha vida
ameazada polas enfermidades, a fame, a violencia, a falta de acceso
á escola ou a desprotección. Estes riscos quedan patentes na actual
situación que están a vivir os nenos refuxiados e migrantes en
camiño cara a Europa desde países de Oriente Próximo e do África
subsahariana", manifestou Carmelo Angulo, presidente de UNICEF
Comité Español.
Para UNICEF, a única maneira de
ofrecer unha oportunidade xusta aos nenos que foxen da guerra e os
conflitos de Siria, Iraq, Afganistán, de Sudán do Sur ou de
República Centroafricana é unha resolución política urxente dos
conflitos nos seus países de orixe e o apoio humanitario. Estes
nenos son vítimas de circunstancias que están fóra do seu control;
non deben agora ser tratados inxustamente e verse obrigados a
afrontar novos obstáculos, fronteiras pechadas, escolas pechadas,
fogares pechados. É de xustiza que se lles dea unha oportunidade a
unha nova vida.
O informe Para cada neno,
unha oportunidade. A promesa da equidade revela datos que
manifestan as profundas desigualdades que existen entre os
nenos:
- Case a metade das mortes dos nenos menores de 5 anos, e o 43% dos nenos que non van á escola, viven en países afectados por conflitos e desastres naturais.
- A metade dos 159 millóns de nenos que sofren desnutrición crónica viven en África subsahariana ou no sur de Asia.
- Máis de 2.400 millóns de persoas aínda non teñen acceso a saneamento.
- As nenas das familias pobres teñen 4 veces máis posibilidades que as das familias ricas de contraer matrimonio antes dos 18 anos.
Os nenos que viven nos fogares
máis pobres, teñen o dobre de posibilidades de morrer antes dos
cinco anos que aqueles de os fogares máis ricos, e cinco veces máis
posibilidades de estar fóra da escola.
A desigualdade que existe entre
os nenos e as súas familias en España tamén é unha preocupación
para UNICEF España. As altas taxas de risco de pobreza
infantil, que alcanzan o 30,5%, e a redución do investimento na
infancia a partir da crise abonan un escenario no que o risco de
deixar atrás a unha importante parte dos nosos nenos e adolescentes
pódese converter nunha realidade.
"Ante as eleccións xerais, en
UNICEF España presentamos aos partidos políticos unha serie
de propostas para que sexan
incluídas nos programas electorais. Propoñemos converter a
aplicación dos dereitos da infancia nun aceno de identidade das
accións do próximo goberno", declarou o presidente de UNICEF Comité
Español, Carmelo Angulo. Un Pacto pola Infancia, catro metas para a
próxima lexislatura e 22 medidas articulan estas propostas
relacionadas co investimento en infancia, a calidade e equidade dos
servizos públicos -educación, protección, vivenda, sanidade-, e a
loita contra a pobreza infantil tanto en España como fóra do noso
país a través da cooperación ao desenvolvemento e a axuda
humanitaria.
Accede aos informes e documentos:
· Para cada neno, unha oportunidade. A promesa da equidade
· Protexer aos nenos refuxiados e migrantes. Todos os nenos teñen os mesmos dereitos
· Propostas para os programas electorais 2015
Materiais audiovisuais disponñbles en:
ftp://video.unicef.es/20N_2015
Usuario Refcom
Contrasinal uce442087