Declaración de Marie Pierre Poirier, coordinadora especial de UNICEF para a crise de refuxio e migración en Europa
O compromiso por parte do Reino Unido e Francia para atopar solucións urxentes para os centos de nenos refuxiados e migrantes que languidecen en Calais desde hai meses, non podía chegar nun momento máis oportuno, dixo Marie Pierre Poirier, coordinadora especial de UNICEF para a crise de refuxio e migración en Europa.
Ante o peche inminente do
campamento de Calais e ante a inminente chegada do clima húmido do
inverno, é unha boa noticia coñecer que moitos dos nenos terán un
novo fogar e unha nova esperanza no Reino Unido nos próximos días.
Damos a benvida tamén ao compromiso de Francia para atopar
solucións para aqueles nenos refuxiados e migrantes que
permanecerán no seu territorio. Isto estaba pendente desde hai
moito tempo.
Durante moitos meses, uns 1.200
nenos viviron en condicións deplorables no campo de Calais,
expóndose ao abuso, a explotación e os accidentes de tráfico
agardando un destino incerto.
Podemos imaxinar o enorme alivio
que os propios nenos experimentarán finalmente cando se lles ofreza
unha casa apropiada, asistencia, acceso á educación e un futuro -
non só aos que irán ao Reino Unido, senón tamén os que quedan en
Francia. O seu interese superior debe guiar as decisións das
autoridades en cada paso do camiño.
Nós, en UNICEF, xunto con moitos
dos nosos aliados que durante tanto tempo estiveron presionando no
seu nome, compartiremos o alivio dos nenos unha vez que os gobernos
de ambos os lados da canle inglesa presten total atención aos
chamamentos realizados polos moitos activistas locais, voluntarios,
ONG e organismos internacionais incluíndo os Comités Nacionais de
UNICEF do Reino Unido e Francia, para lograr solucións duradeiras
para atender a refuxiados e migrantes.
Esperamos aínda un maior
compromiso por parte de todas as autoridades, non só na súa
obrigación legal para cos nenos, tamén na súa obrigación moral de
protexer a todos aqueles que se viron obrigados ao
desarraigamento.
Para coñecer máis e colaborar co traballo de UNICEF na crise de refuxiados e migrantes:
https://www.unicef.es/infancia/emergencias-ayuda-humanitaria/crisis-de-refugiados