Declaración de Leila Zerrougui, Representante Especial do Secretario Xeral para a cuestión dos nenos e os conflitos armados e Peter Salama, Director rexional de UNICEF en Oriente Medio e África do Norte
"Os nenos de Iemen están a levarse a peor parte dun conflito brutal. O cesamento das hostilidades que entrou en vixencia hoxe é unha oportunidade para que as partes actúen e melloren a súa protección.
O ano pasado Nacións Unidas
verificou un significativo aumento de graves violacións contra os
nenos cometidas por todas as partes no conflito de Iemen. Segundo
datos recentes, 900 nenos foron asasinados, un aumento sete veces
maior se o comparamos con 2014. O recrutamento de nenos
multiplicouse por cinco, con 848 casos verificados. Á súa vez, os
ataques ás escolas e hospitais duplicáronse, alcanzando un total de
máis de 115. A interrupción na prestación dos servizos básicos ha
privado a miles de nenos do seu dereito fundamental á educación e a
saúde.
Os incidentes que Nacións Unidas
puido verificar representan a punta do iceberg, pero revelan
algunhas tendencias moi preocupantes. En primeiro lugar, estímase
que os nenos supoñen ao redor dunha terceira parte de todos os
civís asasinados e preto dun cuarto dos feridos. Ademais, os
ataques ás infraestruturas civís, especialmente escolas e clínicas,
convertéronse en habituais. Por último, os nenos están a adquirir
agora un papel máis activo nos combates e postos de control mesmo
na primeira liña.
Estes datos en conxunto
representan un patrón alarmante do flagrante incumprimento do
dereito internacional humanitario e dos dereitos dos nenos en
Iemen. Estes patróns teñen implicacións para a estabilidade de
Iemen e para o futuro dos seus nenos.
Esperamos que o cesamento das
hostilidades e as conversacións de paz programadas para o 18 de
abril, teñan como resultado a finalización deste conflito.
Facemos un chamamento a todas as partes no conflito para cumprir as
súas obrigacións baixo o dereito internacional humanitario, a
comprometerse a liberar os nenos que foron recrutados e utilizados
nos enfrontamentos, e a acabar con todas as violacións graves
contra os nenos e as nenas.
As partes deberían tomar todas as
medidas posibles para protexer as escolas e hospitais, e facilitar
a entrega de axuda humanitaria aos nenos e a todos aqueles que a
necesitan".