500 nenos mortos e 1,7 millóns en risco de desnutrición tras seis meses de violencia en Iemen
Os seis meses de violencia incesante en Iemen deixaron polo menos 505 nenos mortos, 702 feridos e máis de 1,7 millóns en risco de desnutrición, segundo dixo hoxe UNICEF.
En todo o país, preto de 10
millóns de nenos -o 80% de toda a poboación menor de 18 anos-
necesita axuda humanitaria urxente. Máis de 1,4 millóns de persoas
víronse obrigadas a fuxir das súas casas.
"Cada día que pasa, os nenos ven
as súas esperanzas e soños para o futuro esnaquizados", dixo o
representante de UNICEF en Iemen, Julien Harneis. "Os seus fogares,
escolas e comunidades están a ser destruídos, e as súas propias
vidas están cada vez máis ameazadas pola enfermidade e a
desnutrición".
Mesmo antes do conflito, a
situación nutricional era moi grave, xa que Iemen produce menos do
10% das súas necesidades alimentarias e depende en gran medida de
alimentos importados. Pero a escalada de violencia provocou unha
espiral de inseguridade alimentaria e o aumento da desnutrición. As
consecuencias para os nenos son dramáticas:
· O
número de nenos menores de 5 anos en risco de sufrir desnutrición
severa aguda triplicouse en 2015: 537.000 nenos están agora en
risco, en comparación cos 160.000 de antes do conflito.
·
Prevese que case o dobre de nenos menores de 5 anos, un total de
1,2 millóns, sufrirán desnutrición aguda moderada, fronte a 690.000
antes da crise.
A escaseza de alimentos e o pobre
acceso aos mercados causado polo conflito, o acceso limitado ás
instalacións sanitarias e saneamento, e a interrupción das
oportunidades de traballo son as maiores causas desta
deterioración. A escaseza de combustible, electricidade, gas, auga
e outros servizos, está a empeorar a situación.
No últimos seis meses aumentaron
os ataques a civís e infraestruturas fundamentais. Dende a
intensificación do conflito en marzo de 2015, UNICEF verificou
ataques ou danos en 41 escolas e 61 hospitais como consecuencia dos
combates.
Atopar auga potable converteuse
nunha batalla diaria pola supervivencia para máis de 20,4 millóns
de persoas. Máis de 15 millóns de persoas perderon o acceso a
asistencia médica básica, e a educación de 1,8 millóns de nenos
interrompeuse polo peche de escolas.
A pesar destas difíciles
condicións, UNICEF e os seus aliados estiveron no centro das
operacións humanitarias desde o inicio do conflito. A resposta
centrouse en proporcionar auga potable e saneamento, educación e
servizos de protección infantil, así como tratamento para os nenos
con desnutrición, diarrea, sarampelo e pneumonía.
UNICEF e os seus aliados
proporcionaron acceso a auga potable a 3 millóns de persoas. Os
equipos móbiles de saúde axudaron a fornecer vacinas contra a polio
e o sarampión para máis de 5 millóns de nenos. Uns 93.500 nenos
recibiron tratamento contra a desnutrición severa aguda e máis de
520.000 puideron realizar os seus exames aprazados.
Dende comezos de ano, UNICEF
proporcionou apoio psicosocial a preto de 240.000 nenos para
axudarlles a superar os horrores do conflito. Unhas 360.000 persoas
recibiron material educativo sobre como evitar as minas e
artefactos sen explotar.