'Sueños de Bolsillo (Soños de Peto)', un informe que recolle a situación dos menores emigrantes en España

'Sueños de Bolsillo (Soños de Peto)', unha completa radiografía da situación dos menores estranxeiros non acompañados que chegan a España, contén testemuños desgarradores de moitos destes adolescentes, e pretende converterse nunha ferramenta eficaz para abordar a problemática dos menores inmigrantes en risco de exclusión social

“Tiña as mans entumecidas de tanto agarrarme á corda e intentar non caer ao mar cando as ondas batían en min. Ao chegar, non podía nin abrir as mans nin mover os dedos. non volvería repetir a experiencia”. Con estas palabras, un adolescente marroquí relata a odisea sufrida para acadar a costa española nunha fráxil pateira.
 
Este e outros testemuños, tan conmovedores como reais, están incluídos nun exhaustivo informe titulado Sueños de Bolsillo (Soños de Peto), editado por UNICEF España en colaboración con Banesto. O traballo realizárono tres expertos do Grupo de Investigación IFAM da Fundación Pere Tarrés-Universidad Ramon Llull, cuxa finalidade é abordar a situación dos nenos e adolescentes en risco de exclusión social.
 
A publicación constitúe unha radiografía do fenómeno dos inmigrantes menores de idade e non acompañados que chegan ao noso país. Pretende explorar e analizar as novas nacionalidades destes menores, os cambios nas rutas, as pautas migratorias e as dinámicas de integración en España.
 
O propósito do estudo é ampliar os horizontes e proporcionar elementos sólidos de análise que repercutan nun maior benestar dos nenos e adolescentes que residen en España. Khaled, de Marrocos; Viki, de Bulgaria, ou Paul, de Camerún, sufriron unha infancia de privacións nos seus países de orixe e chegaron a España co desexo de cumprir os seus soños: estudar, aprender unha profesión, gozar dunha vida digna. A maioría deles tivo que sobrevivir a dolorosos episodios de maltrato, violencia ou explotación sexual.
 

Unha vida complicada  

Algúns conseguiron volver os seus lugares de orixe despois de constatar que a vida en Europa non era tan fácil como lles dixeran antes de emigrar. Outros permanecen en España, acollidos en centros de menores onde reciben a alimentación e os coidados adecuados, e aprenden unha profesión que, co tempo, lles poida axudar a converter os seus soños nunha realidade.
 
Outro dos obxectivos do informe é investigar a crecente feminización do fenómeno da inmigración de menores non acompañados, tanto no referente ás menores detectadas polos sistemas de protección como ás que non o foron e poden estar vivindo situacións de risco social. Para a elaboración do libro realizáronse 247 entrevistas, 94 a profesionais e 153 a menores.
 
Consulta o informe Sueños de Bolsillo (Soños de Peto)