Sudán do Sur: 1 de cada 3 nenos está desnutrido nas áreas máis golpeadas pola violencia
Os nenos de Sudán do Sur enfróntanse a un empeoramento da crise nutricional ao intensificarse os combates.
Case 250.000 nenos están nun risco considerable debido a que a seguridade alimentaria e nutricional se está a deteriorar rapidamente nalgunhas partes do país.
Se estes nenos non reciben tratamento, teñen 9 veces máis posibilidades de morrer que un neno san.
Esta crise é o resultado do actual conflito en Sudán do Sur, a diminución das reservas de alimentos nos fogares e unha economía en recesión.
Sudán do Sur: 874.000 menores de 5 anos enfróntanse á inseguridade alimentaria
O número de persoas que afrontan unha inseguridade alimentaria grave case duplicouse dende o comezo do ano, de 2,5 millóns de persoas a unhas 4,6 millóns, incluíndo aproximadamente 874.000 nenos menores de 5 anos, segundo as últimas predicións do grupo técnico da Clasificación Integrada da Seguridade Alimentaria en Fases (IPC, polas súas siglas en inglés), do que UNICEF é membro. Este é o maior número de familias en crise ou niveis de emerxencia de inseguridade alimentaria dende o inicio do conflito en decembro de 2013.
Dende UNICEF advertimos que os nenos atrapados polo conflito sen acceso a servizos médicos básicos nin alimentos terán que loitar por sobrevivir a este período de escaseza sen unha reanudación urxente da asistencia humanitaria nas áreas afectadas polo conflito.
"A pesar de todos os progresos realizados o ano pasado cos nosos aliados para tratar a desnutrición de máis nenos que nunca, as vidas das mulleres e nenos vulnerables, que esgotaron todos os mecanismos ao seu alcance para facer fronte á situación, están en perigo", explica o representante de UNICEF en Sudán do Sur, Jonathan Veitch.
Sudán do Sur: os nenos sen tratamento teñen 9 veces máis posibilidades de morrer
Ademais desta situación xa extrema, os intensos combates no Gran Alto Nilo forzaron, só no mes de maio, polo menos a 100.000 persoas a fuxir das súas casas, abandonando as súas existencias fundamentais de reservas de alimentos, gando e cultivos. Algúns aliados de UNICEF en nutrición víronse obrigados a retirar os seus servizos e as subministracións nutricionais foron saqueadas.
"Se non se dá acceso humanitario para proporcionar servizos vitais aos nenos e non se seguen preparando subministracións antes de que as estradas sexan impracticables debido á tempada de chuvias, a xa fráxil situación se converterá en catastrófica", explica Veitch.
Dende UNICEF tratamos case 50.000 nenos contra a desnutrición aguda grave no que vai de ano, a través do programa nacional de fomento da nutrición e as Misións de Resposta Rápida nas áreas remotas afectadas polo conflito.