Furacán Matthew en Haití: por que o cólera é a principal ameaza para os nenos agora?

Mentres continúa a avaliación dos estragos causados polo furacán Matthew en Haití, unha ameaza preocupa agora por encima de todo: o cólera. Esta enfermidade que se transmite por consumir auga ou alimentos contaminados pode acabar coa vida dun neno en moi pouco tempo.

 

As inundacións e destrución provocadas tras a catástrofe son o caldo de cultivo perfecto para a propagación do cólera e outras enfermidades relacionadas coa auga. Ademais, a próxima estación de choivas podería complicalo todo.

 

Haití ten un dos niveis de cólera máis altos do mundo. Case 10.000 persoas morreron por mor desta enfermidade desde o ano 2010. Ademais, só este ano, rexistráronse 27.000 casos dos que se calcula que 1 de cada 3 son nenos.

 

O débil acceso da poboación a sistemas de auga e saneamento adecuados dificulta a loita contra esta enfermidade. Só 1 de cada 3 persoas en Haití teñen letrinas adecuadas á súa disposición, unha cifra que empeora nas zonas rurais. Ademais, a defecación ao aire libre é unha práctica habitual.

 

Desde que se iniciou o brote de cólera en 2010, en UNICEF estamos a traballar sen descanso para reducir as enfermidades transmitidas pola auga, mellorando o acceso á auga, saneamento e servizos de saúde para os nenos haitianos e as súas familias, e promovendo ao mesmo tempo unha atención rápida aos casos de cólera.

 

Nos últimos 6 anos establecemos ou mantivemos 1.270 puntos de rehidratación oral e 149 unidades de tratamento de cólera en áreas de alto risco onde se trataron preto de 140.000 supostos casos de cólera.

 

Algúns informes apuntan que, desde o paso do furacán Matthew, xa se produciron novas mortes por cólera. De confirmarse estes datos, estariamos ante un sinal moi alarmante. Por iso, en UNICEF intensificamos os nosos esforzos en auga e saneamento para evitar que se produza unha nova catástrofe.

 

As pastillas potabilizadoras de auga, o tratamento de fontes e o establecemento de letrinas nos refuxios temporais son compoñentes clave da nosa resposta nestes momentos. Tamén imos traballar para garantir a asistencia sanitaria e o tratamento dos nenos con desnutrición.

 

Necesitamos a túa axuda para evitar que os efectos do furacán Matthew en Haití sexan peores que até agora. Só contigo podemos seguir loitando contra o cólera e outras enfermidades transmitidas pola auga. Axúdanos a axudar!