Eu Pido Pacto: o Pacto móvese

Dende que, o pasado mes de xuño, lanzamos noso informe A infancia en España 2014. O valor social dos nenos: Cara a un Pacto de Estado pola Infancia estamos inmersos nunha actividade incesante para promover esta idea, á vez que impulsamos medidas concretas que melloren o benestar dos nenos e as nenas en España.

Por un lado, estamos a promover a adhesión de todo tipo de entidades e institucións, que están a acoller moi ben a iniciativa. Xa nos deron o seu apoio 14 delas, podes consultalas aquí. Se formas parte dalgunha asociación -deportiva, de veciños, cultural, etc- vós tamén podedes sumarvos, temos que ser moitos máis!

#YoPidoPacto: máis de 81.000 persoas xa firmaron

Estas entidades, únense ás máis de 81.000 persoas que, a título individual, xa mostraron o seu apoio a esta iniciativa. Aínda que as firmas se dirixen especialmente aos adultos, non quixemos deixar fóra os verdadeiros protagonistas do Pacto: os nenos. Por iso, elaboramos unha versión adaptada do informe, que xa foi utilizado por Parlamentarios infantís de toda España para apoiar a proposta do Pacto de Estado (podes ler a noticia aquí). No ámbito educativo, xa hai máis de 1.500 alumnos de 19 centros educativos que se sumaron ao Pacto, se es profe podes encontrar máis información no noso portal educativo.

Todos estes apoios e adhesións son fundamentais para seguir promovendo a idea do Pacto entre os distintos actores sociais e políticos. Dende que lanzamos o informe, reunímonos cos voceiros parlamentarios do Grupo Popular no Congreso, Grupo Mixto, PNV e Esquerda Plural. Ademais, tivemos encontros con outros representantes parlamentarios de CiU, UPyD e o Grupo Socialista. Moitos deles están a poñer en marcha distintas iniciativas parlamentarias relacionadas coa infancia, tales como a Proposición non de Lei sobre a Infancia que presentou en setembro o grupo de Esquerda Plural. Xa en outubro, UPyD presentou outra Proposición non de Lei sobre a instauración dunha Prestación Universal por Fillo a Cargo. Sobre este mesmo tema, que nós incluímos como un aspecto clave para loitar contra a pobreza infantil dentro da proposta do Pacto, CiU presentou pola súa banda unha Proposición de Lei, cuxa tramitación se discutirá en breve no Congreso. Ademais, aquí podedes ver a resposta do Goberno a varias preguntas parlamentarias relacionadas coa pobreza infantil.

No que respecta á relación co goberno, mantivemos diversas reunións coa Ministra de Sanidade, Servizos Sociais e Igualdade, así como coa Secretaria de Estado de Servizos Sociais e Igualdade e a Directora Xeral de Servizos para a Familia e a Infancia. A Ministra comprometeuse a poñer en marcha un grupo de traballo que, a nivel técnico, analice propostas concretas que permitan mellorar a situación dos nenos e nenas afectados pola pobreza.

O Pacto de Estado contra a Pobreza Infantil chega ao Congreso

Pola súa banda, o goberno detallou hai unhas semanas as súas previsións para os Presupostos Xerais do Estado de 2015 en materia de familia e infancia. Se che interesa afondar sobre este tema, podes ver aquí a análise que fixo Save the Children ao respecto. Ademais, precisamente no debate parlamentario sobre os presupostos o Secretario Xeral do PSOE propuxo un gran Pacto de Estado contra a Pobreza Infantil.

Tamén hai novidades dende as Comunidades Autónomas, posto que tamén hai unhas semanas se aprobou a Lei de Protección Social e Xurídica da Infancia e a Adolescencia de Castela-A Mancha. Nesta mesma comunidade, así como en Canarias, estanse a ultimar os traballos para poder asinar nas próximas semanas senllos Pactos Autonómicos pola Infancia, que se unirían aos 9 xa existentes en todo o territorio español.

A Consellaría de Familia e Igualdade de Oportunidades de Castela e León traballa na firma dun protocolo de accións concretas no marco do Pacto Autonómico da Infancia de Castela e León. En Galicia, o Valedor do Pobo oficializará a súa adhesión ao Pacto nas próximas semanas.

En definitiva, son moitas as actividades, iniciativas e procesos postos en marcha que fan que o Pacto de Estado pola Infancia pareza unha realidade un pouco máis próxima. Non obstante, non podemos conformarnos, posto que a situación de demasiados nenos e nenas necesita respostas moito máis urxentes. Contamos coa túa axuda para seguir avanzando!

Post de Marta Arias Robles, directora de Sensibilización e Políticas de Infancia UNICEF Comité Español