Ucraína: atención da saúde co apoio da Deputación de Pontevedra

Nenos, nenas e mulleres embarazadas e lactantes en centros de saúde, hospitais e outros lugares de refuxio, reciben suplementos nutricionais e medicamentos esenciais

Control de la salud a una niña en Ucrania.
16/06/2022
 

5,2 millóns de nenos en Ucraína e países de acollida a refuxiados necesitan axuda humanitaria. UNICEF estivo proporcionando desde o primeiro momento artigos de auga, saneamento e hixiene; acceso a auga segura, medicinas, vacinas, kits cirúrxicos e obstétricos, roupa infantil de inverno, suplementos nutricionais, materiais educativos, kits de lecer, axudas en efectivo ou apoio psicolóxico.

A Deputación de Pontevedra quixo unirse a UNICEF nesta crise de dereitos de infancia, na que a situación dos 7,5 millóns de nenos ucraínos é cada día máis desesperada.

Destruíronse hospitais, instalacións de auga, centros educativos e escolas infantís. O acceso á auga potable, a educación, a saúde, os medios de subsistencia e o apoio dos servizos sociais está interrompido.

A saúde infantil e materna viuse gravemente afectada, xa que moitos centros de saúde quedaron sen subministracións e material cirúrxico, ademais de auga, electricidade e calefacción.

É probable que o acceso ás vacinas esenciais se deteriore aínda máis, exacerbando os trastornos causados pola pandemia da COVID-19. 

O estado nutricional dos nenos e nenas tamén corre perigo, a medida que os recursos das familias se esgoten e os servizos de nutrición se volvan inaccesibles.

Con máis de 145.000 nenos e nenas que necesitan urxentemente apoio nutricional, necesítanse subministracións nutricionais esenciais (galletas de alto contido enerxético e suplementos de  micronutrientes) para nenos menores de cinco anos e mulleres embarazadas e lactantes.

Co apoio da Deputación de Pontevedra, UNICEF proporcionará atención médica e nutricional con subministracións esenciais que garantan a atención necesaria das persoas que están en zonas asediadas ou de difícil acceso e nos centros de saúde, hospitais e outros lugares de refuxio habilitados para as familias.

Para iso UNICEF comprará e distribuirá kits de emerxencias, con subministracións sanitarias necesarias para responder ás necesidades inmediatas dos desprazados internos; kits de primeiros auxilios; un kit de partos, que contén o equipo médico e os medicamentos principais para realizar 100 partos, incluídos 50 partos con dificultades; así como subministracións nutricionais, como galletas de alto contido enerxético e suplementos de micronutrientes para os nenos e para as nais embarazadas e lactantes.

Co obxectivo de previr a anemia e fortalecer a capacidade de aprendizaxe, o desenvolvemento motor e o sistema  inmunolóxico, a intervención tamén inclúe ferro e ácido fólico para nais e mulleres en período de lactación.