Reforzamos o sistema de protección en Uganda
Co apoio da Xunta de Galicia aseguramos que as nenas e os nenos estean protexidos fronte á violencia
04/10/2023
A complexa crise humanitaria en Sudán do Sur continúa desprazando poboación cara a Uganda, o maior país de acollida de África, con máis de 1,5 millóns de persoas refuxiadas e solicitantes de asilo.
A poboación refuxiada segue sufrindo toda unha serie de violacións de dereitos que se manifestan en diversas formas de abuso, explotación e abandono. Os nenos e as nenas enfróntanse a problemas específicos de protección que inclúen o risco de abuso, neglixencia, violencia e explotación nos seus países de orixe, durante a fuxida e dentro dos asentamentos de poboación refuxiada e nas comunidades de acollida.
Os riscos de protección deben abordarse de forma preventiva mediante actividades que traten de lograr un cambio de coñecementos, actitudes e percepcións entre as poboacións refuxiadas. Doutra banda, os casos identificados requiren unha resposta multisectorial oportuna e adecuada en materia de protección da infancia, incluída a violencia de xénero.
Reforzo do sistema de protección
No marco do Pacto de Estado contra a Violencia de Xénero do Ministerio de Igualdade do Goberno de España, e grazas á colaboración da Xunta de Galicia por cuarto ano consecutivo, UNICEF Comité Galicia apoia ao Goberno Local do Distrito de Yumbe para reforzar o seu sistema de protección, un dos trece distritos de acollida de poboación refuxiada do país e que limita ao norte con Sudán do Sur.
En liña co V Plan director da Cooperación Galega 2023-2026 e a Estratexia de Acción Humanitaria da Cooperación Española 2019-2026, a intervención contribúe a alcanzar a medida 37 do Pacto de Estado contra a violencia de Xénero. Dita medida está dedicada a instar a que nos recursos dedicados á cooperación internacional para refuxiados e refuxiadas aplíquense accións específicas para a prevención da violencia machista contra as mulleres e menores de idade, tanto en tránsito como en destino. Tamén se fará especial incidencia sobre os Obxectivos de Desenvolvemento Sostible (ODS) da Axenda 2030, en particular no ODS 5, destinado a lograr a igualdade de xénero e a adquisición de poder e independencia das mulleres e das nenas.
A intervención chegará a unhas 2.194 persoas refuxiadas e das comunidades de acollida do distrito de Yumbe, incluíndo Bidibidi, o asentamento máis grande do país. O distrito acolle a máis de 190.000 persoas refuxiadas, na súa maioría procedentes de Sudán do Sur, das que o 61% son nenos, nenas e adolescentes.
A acción impleméntase a través da coordinación regular, o fortalecemento das vías de derivación e os sistemas de xestión da información, ademais da promoción dunha maior asignación orzamentaria para a protección da infancia.
As nenas, nenos, adolescentes, nais, pais e coidadores/as, membros da comunidade, e o persoal gobernamental, recibirán apoio a través da posta en marcha dun manual nacional de crianza e de formacións e intervencións sobre habilidades para a vida. Ademais, as nenas, os nenos e adolescentes beneficiaranse de servizos individualizados de xestión de casos e resposta a diferentes formas de violencia, incluída a violencia de xénero contra a infancia.
O apoio tamén inclúe o fortalecemento da coordinación da protección infantil no distrito e o reforzo do Sistema de Información de Xestión da protección co obxectivo de recompilar, analizar e xerar datos administrativos rutineiros e poder supervisar os indicadores de rendemento en relación a todas as formas de violencia contra a infancia, adolescentes e mulleres, incluídas as prácticas nocivas.
¿Te gustaría hacer algo extraordinario hoy?
Hazte socio. Elige ahora tu aportación mensual.
