Protexemos aos nenos de Mauritania fronte á violencia

O proxecto, que conta co apoio da Xunta de Galicia, busca dar resposta e atención ás sobreviventes de violencia de xénero e explotación sexual no país africano.

09/12/2022

A Xunta de Galicia, no marco do convenio asinado con UNICEF o pasado xaneiro para salvar e protexer á infancia en situacións de emerxencia e crise humanitarias, está a apoiar un proxecto para mellorar a prevención de calquera tipo de violencia baseada no xénero e na explotación sexual, así como axilizar unha resposta e atención rápidas e eficaces para as superviventes de episodios de violencia en Mauritania.

Segundo o Chamamento de Acción Humanitaria de UNICEF para Mauritania no ano 2022, un de cada catro nenos e nenas vive na pobreza absoluta, o 80% experimentan polo menos unha forma de violencia e 3 de cada 10 están expostos á seca, inundacións ou sofren desnutrición aguda grave.

A pandemia COVID-19 e os brotes de poliomielitis agravaron a situación e dificultaron o desenvolvemento dunha contorna de protección para a infancia.

A violencia de xénero non é un fenómeno novo en Mauritania; con todo, no marco do conflito de Malí, país veciño, que tivo como consecuencia unha gran afluencia de refuxiados, está a experimentarse un aumento significativo de casos reportados que fai necesaria unha intervención humanitaria nesta materia.

Crear unha contorna de protección para as nenas e adolescentes

Este proxecto enmárcase na necesidade identificada de mellorar a prevención de calquera tipo de violencia baseada no xénero e a explotación sexual, axilizar unha resposta rápida e eficaz para as sobreviventes de episodios de violencia, e unha atención e recuperación adecuada.

Para iso, coa colaboración da Xunta de Galicia, UNICEF reforzará o sistema de resposta e atención integral para as superviventes de violencia baseada no xénero e explotación/abuso sexual en Mauritania, a través da creación dunha contorna protectora que garanta e protexa os seus dereitos no seo da comunidade.

As beneficiarias directas do presente proxecto son nenas e mulleres sobreviventes da violencia baseada no xénero -incluíndo o abuso sexual e a explotación-, o grupo máis exposto ao risco de agresións sexuais.

Entre os beneficiarios indirectos alcanzarase a membros do persoal das ONG e provedores de servizos (saúde, educación e xustiza); membros da comunidade e voluntarios; e, finalmente, axentes de protección da infancia e líderes comunitarios.