Chad: unha crise esquecida que golpea á infancia

Nais xunto aos seus fillos e fillas nunha actividade de control da desnutrición no campamento para refuxiados Marassabré, leste de Chad © UNICEF/UNI956761/Da

22/06/2026

O leste de Chad converteuse nun dos escenarios humanitarios máis complexos e menos visibles do mundo. Nesta rexión, especialmente na provincia de Ouaddaï, millóns de nenos e nenas viven atrapados nunha crise prolongada marcada polo conflito, o desprazamento forzado, a pobreza extrema e os efectos do cambio climático.

En 2026, ao redor de 4 millóns de persoas necesitan asistencia humanitaria no Chad, un país que xa acolle a aproximadamente 2,25 millóns de refuxiados, na súa maioría procedentes do conflito en Sudán. Só no leste, máis de 1,2 millóns de persoas desprazadas chegaron nos últimos anos, exercendo unha enorme presión sobre uns servizos básicos xa de seu fráxiles.

Infancia en risco no epicentro da crise

A maioría das persoas que foxen son nenos, nenas e adolescentes. En moitos casos fano sós ou separados das súas familias, o que aumenta a súa vulnerabilidade fronte á violencia, a explotación ou o abuso. En Ouaddaï, ademais, persisten prácticas nocivas como o matrimonio infantil ou a mutilación xenital feminina, que afectan especialmente a nenas e adolescentes.

A magnitude da crise desbordou os sistemas locais de protección. Os servizos sociais, sanitarios e comunitarios teñen recursos limitados para responder a necesidades urxentes como a atención psicosocial, a reunificación familiar ou a protección fronte á violencia de xénero.

A esta situación súmanse factores estruturais: Chad é un dos países máis pobres do mundo, con máis do 84% da súa poboación en situación de pobreza multidimensional e case a metade dos seus habitantes menores de 14 anos. Esta combinación de vulnerabilidades agrava o impacto de cada nova emerxencia.

A resposta de UNICEF sobre o terreo

Neste contexto, desde UNICEF traballamos para protexer á infancia e garantir o acceso a servizos esenciais nas zonas máis afectadas. En Ouaddaï, reforzamos os sistemas de protección infantil e a resposta fronte á violencia de xénero a través dun enfoque integral que inclúe as seguintes accións:

• Identificación e atención de nenos e nenas en situación de risco.

• Apoio psicosocial.

• Formación de profesionais locais.

• Fortalecemento de mecanismos comunitarios de protección.

Tamén promovemos campañas de sensibilización para previr prácticas nocivas e fomentar contornas seguras para a infancia.

O compromiso da Xunta de Galicia

A resposta de UNICEF no leste do Chad conta co apoio da Xunta de Galicia, a través dun proxecto financiado con 75.000€, que representa o 75% do orzamento total da intervención. Esta contribución permitirá reforzar as accións de protección infantil e prevención da violencia de xénero nunha das zonas máis castigadas pola crise.

Grazas a este apoio, beneficiaranse directamente máis de 2.200 persoas, con especial atención a nenos, nenas e adolescentes, incluídos aqueles en situación de maior vulnerabilidade, dos cales ao redor de 100 serán atendidos de forma directa. Ademais, contribuirá á formación de preto de 200 líderes comunitarios e á difusión de mensaxes clave de protección infantil e prevención da violencia de xénero a máis de 17.500 persoas, no marco dun programa máis amplo que UNICEF desenvolve de forma continuada na rexión.

Unha crise que non pode esperar

A situación no Chad, especialmente na súa rexión oriental, é un claro exemplo de crise esquecida: necesidades humanitarias enormes, escasa visibilidade mediática e financiamento insuficiente. Con todo, o impacto sobre a infancia é devastador.

O apoio de aliados clave como a Xunta de Galicia resulta esencial para garantir que miles de nenos e nenas poidan crecer en contornas máis seguras, con acceso a protección, atención e oportunidades. Nun contexto de crecente inestabilidade global, actuar agora non só salva vidas, senón que contribúe a construír resiliencia e futuro para xeracións enteiras.