UNICEF: a revisión dos procedementos de asilo da UE debería ofrecer unha mellor protección para os nenos afectados pola crise de persoas migrantes e refuxiadas en Europa
Mentres a Unión Europea prepárase para as conversacións decisivas sobre as normas que rexen as solicitudes das persoas que buscan protección en Europa, UNICEF insiste en que os intereses e dereitos dos nenos teñan aínda maior prioridade.
Nos próximos días, 28 estados
membros da UE e o Parlamento Europeo empezarán examinando un
borrador de proposta presentado pola Comisión Europea para reformar
o chamado Regulamento de Dublín. As novas normas determinarán que
Estado será responsable de considerar unha solicitude de protección
internacional que fose presentada en calquera sitio da UE.
O debate xorde no medio da crise
de refuxio e migración que excedeu a capacidade do sistema de
xestión das peticións de asilo, deixando o destino de máis de
400.000 nenos que solicitaron asilo en Europa entre xaneiro e
novembro de 2015 na balanza.
"Este debate é unha oportunidade
para reforzar as garantías que o Dereito Internacional recoñece aos
nenos que buscan asilo en Europa", dixo Noala Skinner, directora da
oficina de UNICEF en Bruxelas. "Para que o sistema de asilo común
en Europa sexa humano, xusto e eficiente, a protección dos nenos
debe ser unha prioridade central".
Entre as medidas que defende
UNICEF están:
-
Axilizar a toma de decisións para evitar expoñer aos nenos a
situacións de risco: baixo o actual Regulamento de Dublín, poden
pasar ata 11 meses desde a chegada do menor, ata o seu traslado ao
Estado que vai estudar a súa solicitude. Este período tan longo
podería dificultar a reunificación familiar e poñer ao menor en
varias situacións de risco. UNICEF recomenda un prazo de 3
meses.
-
Garantir o acceso rápido á información sobre o asilo: Os
estados teñen que garantir que todos os nenos, estean ou non
acompañados por familiares reciben en 72 horas información adaptada
sobre o seu dereito para pedir protección internacional e como ter
acceso.
-
Harmonizar a aplicación do principio do interese superior do
neno para cada menor non acompañado e separado. Isto significaría
que todos os Estados apliquen o mesmo criterio (tal como a
seguridade e benestar do menor) ao estudar unha solución duradeira
para o neno. As opinións do neno e os seus puntos de vista deberían
de ser tidos en conta durante todo o proceso.
-
Poñer a disposición máis recursos e profesionais para
asegurar que os titores legais sexan inmediatamente asignados e así
protexer, orientar e apoiar de maneira adecuada ao menor non
acompañado ou separado.
-
Buscar alternativas á detención: ningún neno debería de ser
detido mentres espera o seu traslado a outro estado, ou que mentres
se designa o seu titor legal, ou recibe un aloxamento adecuado.
UNICEF insta o uso de alternativas que non priven da liberdade aos
nenos e familias solicitantes de protección internacional.