UNICEF pide unha acción ambiciosa ante o cambio climático: "Os nenos xulgarannos, e deben facelo"
Os nenos xa están a pagar un alto prezo debido á inacción do mundo ante o cambio climático, segundo UNICEF.
"O futuro dos nenos de hoxe,
especialmente dos máis desfavorecidos, está en xogo", dixo o
director executivo de UNICEF, Anthony Lake, durante a súa
intervención nun evento da 21ª Conferencia das Nacións Unidas sobre
o Cambio Climático, coñecida como COP21. "Desgraciadamente, estamos
a fallarlles. Porque hoxe os nenos están a sufrir de maneira
desproporcionada as consecuencias do noso clima cambiante. Están a
pagar o noso fracaso coa súa saúde e a súa seguridade. Cos seus
futuros. E, demasiado a miúdo, coas súas vidas".
O informe de UNICEF A menos que
actuemos agora - O impacto do cambio climático nos nenos,
sinala que o cambio climático produce máis secas, inundacións,
ondas de calor e outras condicións meteorolóxicas graves. Isto
provoca que se propaguen máis algunhas das principais causas da
mortalidade infantil, como a desnutrición, a malaria e a diarrea.
Segundo este informe, máis de 500 millóns de nenos viven en zonas
onde as inundacións son moi frecuentes, e por tanto están altamente
expostos ao cambio climático. Moitos destes nenos están en países
cuxos niveis de pobreza son altos.
"Non podemos permitir que a nosa
inacción colectiva ante o cambio climático perpetúe un círculo
vicioso que condena aos nenos máis desfavorecidos a vivir sen
esperanza, a mercé de desastres fóra do seu control", dixo
Lake.
Ademais da redución das emisións,
hai que reducir as desigualdades entre os nenos, afirmou Lake, en
alusión á necesidade de investir en saúde, en servizos esenciais e
infraestrutura básica que resista aos desastres relacionados co
cambio climático.
"O camiño que o mundo escolla
aquí en París marcará o futuro da humanidade", engadiu Lake. "A
Historia xulgaranos. E o que é máis importante, os nosos nenos
xulgarannos -e deberían facelo- pola nosa xestión do planeta que
herdarán".
Lake interveu nun evento
organizado xunto coa Organización para a Cooperación e o
Desenvolvemento Económico (OCDE), no que a sociedade civil e mozas
debateron sobre as maneiras de reducir o impacto dos riscos
climáticos nos nenos máis vulnerables.
Nota aos editores:
No evento houbo outros relatores: Gabriela Ramos, Xefa de Persoal e Asesora do G20 na OCDE; Tatiana Natalie Kondo, Parlamentaria Junior no distrito de Harare Este (Zimbabue); Bill McKibben, fundador de 350.org; e Guillermo Kerber, directivo do coidado da creación e a xustiza climática, do Consello Mundial de Igrexas. A ministra de Medio Ambiente de Nixeria, Amina J. Mohammed, moderou os debates.