UNICEF: os nenos palestinos necesitan mellor protección no sistema israelí de detención militar

UNICEF perfilou hoxe unhas medidas prácticas que poderían adoptarse para mellorar o tratamento dos nenos palestinos que están en contacto co sistema de detención militar israelí.

Nun documento informativo titulado Os nenos na detención militar israelí: observacións e recomendacións, UNICEF recomenda medidas para que os nenos palestinos baixo custodia militar israelí sexan tratados de acordo coa Convención sobre os Dereitos do Neno e outras normas internacionais. Baseado nunha análise do marco legal e testemuños de nenos sobre as violacións dos seus dereitos durante a detención, o documento manifesta que parece haber un patrón de maltrato durante o arresto, o traslado e o interrogatorio de nenos detidos. Inclúe unha serie de recomendacións para mellorar a protección dos nenos, de conformidade coas normas internacionais, tales como a prohibición de vendar os ollos e o réxime de illamento de nenos. O documento tamén recomenda que, salvo en circunstancias extremas, os nenos non deberían ser arrestados pola noite e un avogado ou membro da familia debería estar presente durante o interrogatorio de nenos sospeitosos. O documento tamén reforza as conclusións formuladas polo Relator Especial sobre a situación dos dereitos humanos no Territorio Palestino Ocupado e polo Comité Especial da ONU sobre as prácticas israelís nos territorios ocupados en 2012.UNICEF dá a benvida a algunha mellora xa producida no tratamento dos nenos palestinos no sistema militar israelí nos últimos anos, incluído o aumento da idade -pasando de 16 a 18 anos- en que se considera que os nenos palestinos pasan a ser adultos. UNICEF mantén o seu compromiso coas autoridades militares israelís para mellorar as garantías que promoven os dereitos e o benestar dos nenos palestinos baixo custodia militar.