UNICEF: os nenos están a sufrir as consecuencias da violencia en Ucraína

UNICEF mostra a súa profunda preocupación polos disturbios que se están a rexistrar en Ucraína e polo impacto negativo que están a ter na vida dos nenos. Sabemos que algúns nenos participaron en actos violentos e estamos a examinar os informes que apuntan a que hai nenos que morreron ou que resultaron feridos en Odessa. UNICEF condena enerxicamente estas graves violacións dos dereitos dos nenos.

Segundo UNICEF, aumentou a demanda de servizos psicolóxicos para nenos e ademais interrompéronse os servizos educativos e sanitarios. É perigoso e prexudicial para a saúde e o benestar dos nenos que estes sexan testemuñas ou participen en actos violentos. UNICEF pide a todas as partes que fagan todo o posible para manter os servizos esenciais destinados aos nenos e as súas familias, e que se aseguren de que os nenos non participan nin son usados en actos violentos.