UNICEF e a OMS preparados para apoiar unha campaña de vacinación contra a polio en Ucraína
As axencias de Nacións Unidas son conscientes de que atrasar a campaña pon a 1,8 millóns de nenos en riscoSeis semanas despois do brote de polio en Ucraína, UNICEF e a Organización Mundial da Saúde (OMS) intensificaron os chamamentos para unha primeira rolda nacional de vacinación contra a polio.
O ministro de Sanidade de Ucraína
confirmou dous casos de polio o 1 de setembro. Detectáronse en
nenos da rexión de Zakarpatska, no suroeste de Ucraína. Ningún dos
nenos, de 10 meses e 4 anos, estaba vacinado contra a
enfermidade.
Se non se detén inmediatamente, o
virus pode estenderse por Ucraína, pondo en risco as vidas de 1,8
millóns de nenos. Se non empeza de inmediato unha campaña de
vacinación para parar a transmisión do virus da polio, o risco dun
brote maior continuará.
As directrices internacionais
establecen que un só caso de polio constitúe un brote, e require
unha resposta urxente debido á rapidez coa que pode estenderse a
polio se os nenos non están completamente inmunizados. O brote e as
baixas taxas de vacinación en Ucraína pon en risco a saúde e o
benestar dos nenos, ademais de ameazar a condición de Europa de
"libre de polio".
O brote pode deterse rapidamente
mediante unha campaña nacional de vacinación con tres roldas de
vacinas orais contra a polio, segundo as pautas da Iniciativa
Global para a Erradicación da Polio*, que reúne á OMS, UNICEF e
outros aliados de saúde. UNICEF proporcionou 3,7 millóns de vacinas
orais contra a polio a Ucraína, financiadas polo goberno de Canadá.
A OMS confirmou que as vacinas están en perfecto estado e listas
para usar.
"Canto máis poida circular por
Ucraína o virus da polio, maior será o risco de que o brote se
estenda e paralice a máis nenos. Facemos un chamamento aos
responsables e os traballadores sanitarios en Ucraína para que
tomen medidas inmediatamente e vacinen a todos os nenos para parar
a transmisión do virus", dixo Zsuzsanna Jakab, directora rexional
da OMS para Europa.
Este é o primeiro brote de polio
en Ucraína en 19 anos, e revela a vulnerabilidade dos nenos do
país. Estes dous casos subliñan novamente a importancia dunha
cobertura completa da vacinación para todos os nenos.
"As autoridades teñen a
responsabilidade de protexer aos nenos contra esta enfermidade
debilitante. Compráceme dicir que hoxe o 70% das nais ucraínas son
conscientes dos beneficios das vacinas para protexer aos seus
fillos. As roldas de vacinación deberían empezar xa", dixo
Marie-Pierre Poirier, directora rexional de UNICEF.
Os líderes políticos de Ucraína
deben tomar a decisión de apoiar as medidas de resposta ao brote e
lanzar unha campaña nacional de vacinación para protexer aos nenos
dunha parálise e posible morte evitables.
UNICEF e a OMS están á espera
para dar apoio á campaña.
*A Iniciativa Mundial para a Erradicación da Polio é unha alianza pública e privada dirixida por gobernos nacionais e encabezada pola OMS, Rotary International, os Centros de Estados Unidos para o Control e Prevención de Enfermidades, e o Fondo das Nacións Unidas para a Infancia (UNICEF). Máis información en: http://www.polioeradication.org/AboutUs.aspx#sthash.kNsxDaeL.dpuf