UNICEF distribuirá subministracións para o inverno a 2,6 millóns de nenos sirios
O aviso de duras condicións climáticas aumenta os riscos que afrontan os nenos máis vulnerablesAvecíñase outro duro inverno para os máis de 8 millóns de nenos de Siria que viven tanto dentro do país, arrasado pola guerra, como nos países veciños como refuxiados.
Segundo as previsións
meteorolóxicas este inverno podería ser máis duro que o de anos
anteriores. A temperatura podería chegar aos 13º baixo cero
nalgunhas zonas montañosas durante os días máis fríos de decembro e
xaneiro. Espérase que, igual que nos últimos anos, as tormentas e
as fortes nevadas agraven a situación das familias, que xa loitan
por sobrevivir mesmo en condicións normais. Case cinco anos despois
do comezo da crise, os seus recursos financeiros esgótanse e fan
imposible incluso a adquisición de artigos esenciais como abrigos
ou bufandas.
Este ano UNICEF está a
proporcionar un paquete de axuda para 2,6 millóns de nenos en Siria
e a rexión. Esta asistencia centrarase nos máis afectados, como os
desprazados internos e os que viven en zonas illadas ou en
asentamentos informais.
Dentro de Siria proporcionaranse
subministracións para afrontar o inverno a máis de 1 millón de
nenos, coa distribución de kits de roupa, mantas e calefactores
para as escolas, ademais da repartición de bonos de diñeiro en
efectivo para que as familias poidan comprar o que necesiten para o
inverno. Tamén se atenderán as necesidades doutros 100.000 nenos
nas fronteiras con Turquía e Xordania. Os bonos e as transferencias
de diñeiro en efectivo constitúen o groso da resposta de UNICEF ao
inverno en Turquía, Líbano, Iraq e Xordania.
Este apoio é adicional aos
programas existentes de saúde, educación, auga e saneamento e
protección, que seguen alcanzando a millóns de nenos na rexión, e
ao recentemente introducido para proporcionar asistencia en
efectivo e bonos ás familias con fillos de ata 15 anos.
"Estes meses son especialmente
brutais para os nenos", dixo Peter Salama, director rexional de
UNICEF para Oriente Medio e África do Norte. "Teñen un maior risco
de desenvolver infeccións respiratorias debido ao frío, e están en
perigo cando as familias queiman plástico ou outros materiais
tóxicos no interior dos seus refuxios para manterse quentes".
O conflito causou o desprazamento
no interior de Siria de máis de tres millóns de nenos, algúns deles
en múltiples ocasións. Máis de 2,2 millóns de nenos viven como
refuxiados nos países veciños: Turquía, Líbano, Xordania, Iraq e
Exipto.
UNICEF lanzou hoxe o seu
chamamento de fondos anual, que ascende a 1.100 millóns de dólares,
para dar apoio aos seus programas en Siria e os países
veciños.